«Кытай массыыналара тургутууну ааспатылар…»

Арассыыйаҕа былырыын иккис ырыынакка кытай массыыналарын атыыта икки төгүл үрдээбитэ бэлиэтэммитэ. Итиниэхэ ордук 2021-2025 сыллардааҕы оҥоһуулаах массыыналар атыыламмыттара элбээбит.

Ол да буоллар, суоппардар тургутууну ааспатах кытай автопромун оҥоһуктарыгар кэлэйэн, көрүү-харайыы сыаната үрдүөҕүн иннинэ массыыналарын атыылыырга туруннулар диэн эспиэрдэр быһаараллар.  Итиниэхэ үгүс массыына хаһаайыттара саҥа кытай массыыналарын мааркаларыгар олоруохтара, атыны атыылаһар кыахтара суох диэн эттилэр.

Туһаныллыбыт массыыналар ырыынагар Кытайтан саамай атыыланар үс бастыҥ бренд кэккэтигэр «Chery» (62 тыһыынча массыына, 2025 сылга атыыламмыт уопсай ахсааныттан 21,9%), «Geely» (55,5 тыһыынча, 19,6%) уонна «Haval» (39,1 тыһыынча, 13,8%) киирэллэр. Саамай элбэх «Jetour» мааркалаах массыына атыыламмыт (+2184%).

Кытай массыыналарын хаһаайыттара туохтан кэлэйбиттэрий?

Арассыыйаҕа иккис ырыынакка кытай массыыналарын атыытыгар, кыратык сүүрдүллүбүт, саҥа кэриэтэ массыыналары киллэрии мааркаларын сорҕотугар эрэ дьайда, диэн Арассыыйа массыына хаһаайыттарын федерациятын салайааччыта Сергей Канаев быһаарар.

Былырыын итинник схема ситиһиилээхтик үлэлиир этэ, оттон билигин Кытай былаастара хааччахтары киллэрдилэр: массыына атын дойдуга таһаарыллыан иннинэ, дойду реестрыгар алта ыйтан итэҕэһэ суох кэмҥэ туруохтаах.

«Кытайдар» массыыналарын мотуордарын ресурсата намыһах. Ону таһынан, электроникалара кыһын эрэ буолбакка, күһүн сииктээх-ардахтаах күн-дьыл туругар эмиэ мөлтөҕүн көрдөрдүлэр. Бүтэһик сылларга комфорт өттүгэр ирдэбил аҕыйаата: кытай оҥорооччулара ити хайысхаҕа биллэрдик сайыннылар. Ол эрээри кузовтара түргэнник дьэбиннирэр — 2020-2021 сыллардаахха ырыынакка кэлбит массыыналарга бэлиэтэнэр», — диир эспиэр.

Итинтэн сылтахтанан кытай массыыналарын хаһаайыттара тимир көлөлөрүн атыыга таһааралларыгар тиэртэ. Оттон маннык массыыналары атыылаһыан сөптөөх дьон – массыыната суох эбэтэр эргэ Lada-лаах дьон буолаллар, диэн Канаев салгыыр.

Кини билгэтинэн, эргэ массыыналарын атыылаан, суоппардар собуоттан тахсыбыт саҥа кытай массыыналарын мааркаларыгар көһөн олоруохтара. Оттон үс сыл буолан баран, баҕар, эмиэ салгыы атыылыахтара, диэн кини сабаҕалыыр.

«Хас да сыл буолан баран бу массыыналар алдьаналлар. Онуоха көрүү-харайыы уонна өрөмүөннээһин саҥа массыынанан солбуйардааҕар ороскуота быдан үрдүк. Итиниэхэ кытай массыыналарын биир уратыта — Европа, Япония уонна Корея массыыналарынааҕар сыл аайы сыаналара быдан түргэнник түһэр. Ол курдук, сыл ахсын кытай массыыната 500 тыһыынча солк. чэпчиэн уонна түөрт сыл иһигэр сыанатын аҥаарын сүтэриэн сөп. Ол иһин дьон массыына олох чэпчии илигинэ атыылыырга ыксыыллар», — диир эспиэр.