Эспиэр учаастакка туох кутуллуохтааҕын уонна көҥүллэммэтин быһаарда

Өскөтүн учаастак намыһах, бадарааннаах сир баар буоллаҕына, хайдах сокуон хараҕынан үрдэтэр туһунан Дьокуускайдааҕы судаарыстыбаннай экологическай хонтуруол кэмитиэтин салайааччытын солбуйааччыта Мария Мигалкина быһаарда. Быһаарыыны СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин пресс-сулууспата таһаарда.

Учаастакка туох кутуллуохтааҕый уонна көҥүллэммэтий?

Айылҕа матырыйааллара эрэ көҥүллэнэллэр: кумах, щебень, гравий, буор. Ол эрээри, уу эбийиэктэрин түгэҕэ уонна кытыллара уларыйбат түгэнигэр. Уу эбийиэктэрин аттыгар сири кутан толорорго Уу сыһыаннаһыыларыгар уонна балыктааһыны салайыыга департаментан анал быһаарыы ирдэнэр.

Сир учаастагын ханнык баҕарар тобоҕунан, ол иһигэр тутуу бөҕүнэн, кутан толоруу бобуллар уонна тулалыыр эйгэни киртитиинэн ааҕыллар.

«Кэлиҥҥи сылларга учаастагы кытаанах тобоҕунан кутан толоруу түбэлтэтэ элбээтэ. Үксүн көтүрүллүбүт дьиэ маһа, эргэ массыына кузовтара уонна оннооҕор кытаанах хомунаалынай тобохтор туһаныллаллар», — диэн эспиэр бэлиэтиир. Бу улахан ыстараапка — хас да сүүс тыһыынча солкуобайга тиэрдиэн сөп.

Эппиэтинэс — ыстараап

Эппиэтинэс 100 кв. м иэннээх учаастака буору кытта кытаанах тобоҕунан кутууттан саамай кыра хоромньу 80 тыһ. солк. сыаналанар. Ол аата, алта суотай иэннээх учаастакка бөҕүнэн кутуу буруйдаахха 480 тыһ. солк.а, оттон уон суотайга — 800 тыһ. солк. буолуоҕа. Бу суума, өскөтүн химическэй киртитии, сир хаачыстыбата мөлтөөһүнэ эбэтэр ордук кутталлаах тобоҕу быраҕыы булулуннаҕына, хас да төгүл улаатыан сөп диэн Дьокуускайдааҕы судаарыстыбаннай экологическай кэтэбил кэмитиэтин салайааччытын солбуйааччыта Мария Мигалкина быһаарда.

«Онон, учаастагы сыыһа үрдэтии улахан ороскуокка кубулуйуон сөп», — диэн исписэлиис бэлиэтиир. Учаастак бас билээччититтэн ураты, учаастагы тобоҕунан киртитии иһин сокуону кэһэн кутуу атын кыттыылаахтара эмиэ эппиэтинэс сүгэллэр — таһаҕас массыынатын, экскаватор эбэтэр погрузчик бас билээччилэрэ.