Эспиэрдэр үрдүк таһымнаах психологтартан сүбэлэтиҥ-амалатыҥ диэн сүбэлииллэр

Кэлиҥҥи кэмҥэ байыаннай госпиталларга тиийэн үлэлээччилэргэ аналлаах боппуруостарга ыйытыылары биэрии элбээбит.  Психологтар хас биирдии байыаһы уонна  госпиталларга сытар байыастарга кэлбит кинилэр дьиэ кэргэттэрин, чугас аймахтарын кытта ыкса үлэлииллэр. Бу туһунан Өрөспүүбүлүкэтээҕи психологическа киин дириэктэрэ Владимир Скрябин иһитиннэрдэ.

«Тустаах үлэ бойобуой стреһи намтатыыга туһаайыллар. Үлэ биирдиилээн уонна бөлөҕүнэн ыытыллар. Уопсай ылан этэр буоллахха, байыаннайдар туруктара ортоһуор. Уустук турук байыастарга буолбакка, кинилэр чугас дьонноругар баар буолар — кэргэттэригэр, ийэлэригэр уонна бииргэ төрөөбүттэригэр. Маннык турук, биллэн турар, төттөрүтүн байыастары аймыыр. Онон бэйэни кыана туттуохха наада», – диэн киин дириэктэрэ этэр.

Кини быһаарбытынан, итиннэ араас буола турар сабыытыйалар, олох-дьаһах стреһэ эбиллэн биэрэллэр. Онон психологтар маннык сүбэни-аманы биэрэллэр:

— байыаннай сулууспалааҕы кытта кэпсэтэргитигэр, киниэхэ эрэнэргитин, кини олоххо уопуттааҕын, муударайын туһунан санатыҥ;

— Кэпсэтии кэмигэр мөкү, мөлтөх сонуннары тумнуҥ;

— Эрэбилэ суох, сымыйа иһитиннэриилэри бастаан  ийэлэр кэмитиэттэриттэн,  «МыВместе» волонтердар ыстааптарыттан ыйытан чуолкайдааҥ;

— Идэлээх  психологтартан сүбэни-аманы хайаан да ылыҥ. Уонна ыйытартан олох кыбыстымаҥ.

«Психолог ханнык да учуокка туруорбат, кини сүбэ-ама биэрэр. Биһиги кииммитигэр үрдүк таһымнаах исписэлиистэр үлэлииллэр. Кэпсэтии туһунан ханна да атын сиргэ кэпсэниллибэт. Онон тустаах дьон 8-800-100-35-50 диэн нүөмэргэ эрийэн тиийиэххитин сөп», – диэн Өрөспүүбүлүкэтээҕи психологическа киин дириэктэрэ Владимир Скрябин иһитиннэрдэ.