Өссө икки гибрид энергокомплексы киллэрэри былаанныыллар

Саха сиригэр 2025 сыллахха икки гибриднэй энэргэтиичэскэй комплексы киллэрэри былаанныыллар.

Бу туһунан өрөспүүбүлүкэ Ил Дархана Айсен Николаев “Энэргиэтикэ” хайысхатынан РФ Судаарыстыбаннай Сэбиэтин хамыыһыйатын мунньаҕар иһитиннэрдэ.

Үлэ «РусГидро» хампаанньаны кытта сөбүлэһии чэрчитинэн ыытыллар. Бу иннинэ уопсайа 13,7 МВт кыамталаах 12 автоматизированнай гибрид энергетическэй комплекстар үлэҕэ киирбиттэрэ.

“Аҥардас бу 2024 сылга 1650 туонна дизельнэй уматыгы харыстыыр ​​кыаҕы биэрдэ. Өссө 61 энэргосервис эбийиэгин саҥардыы былааннанар, ол иһигэр 2025 сылга үлэҕэ киириэхтээх икки энэргэтиичэскэй комплексы — Кэбээйи улууһун Сангаар бөһүөлэгэр уонна Өймөкөөн улууһун Куйдуһун нэһилиэгэр», — диэн Николаев иһитиннэрдэ.

Саҥардыллыбыт эбийиэктэр баар нэһилиэнньэлээх пууннара бары кииннэммит уоттан ыраахтар. Олорго кыһыҥҥы кэмҥэ салгын кыраадыһа -60 кыраадыстан аллараа түһэр, ол иһин уотунан хааччыллыы эрэллээх буолуута олохтоох дьон олохторугар уонна куттала суох буолууларыгар улахан суолталаах.

Өрөспүүбүлүкэ баһылыга этэринэн, уопсайа 73 эбийиэк саҥардыллара былааннанар. Бырайыактар ​​20 млрд солкуобай инвестиция кээмэйдээх энэргэсиэрбис хантараактарын мэхэньиисимин көмөтүнэн олоххо киириэхтээхтэр.

Бу эбийиэктэр хатылана турар эниэргийэ источниктарыгар (ХТЭИ) олоҕурбут аныгы технологиялары туһанан оҥоһуллаллар. Хас биирдии энэргэтиичэскэй комплекс биир кэлим салайыыга холбоммут үрдүк таһаарыылаах дизельнэй электростанцияны, күн уотун станциятын уонна энергияны мунньар систиэмэни бэйэтигэр илдьэ сылдьар диэн иһитиннэрэр Ил Дархан, бырабыыталыстыба пресс-сулууспата.