Эстафетаҕа нэһилиэнньэ бары араҥата хабылынна

Кэбээйи улууһун Ньидьили нэһилиэгэр  А.С. Борисов аатынан «Тускул» култуура сайдыытын киинин иһинэн Улуу  Кыайыы 80 сылынан,  Арассыыйаҕа, Саха Өрөспүүбүлүкэтигэр Аҕа дойдуну уонна Ийэ дойдуну көмүскээччилэр, улууска Патриотизм  сылларыгар аналлаах  көлүөнэлэр икки ардыларынааҕы «Түмсүөҕүҥ, сомоҕолоһуоҕуҥ — эйэлээх олоҕу тутуоҕуҥ» диэн  бэстибээл кэнсиэртэр ыытылла тураллар.

“Эстафетаҕа нэһилиэнньэ бары араҥатын сааһыттан тутулуга суох хаптыбыт, төрүт үгэстэрбитин сөргүттүбүт, үйэтиттибит, ыччаты патриотическай тыыҥҥа ииттибит. Ол курдук,  улахан тэрээһиҥҥэ ыччаттар уонна орто көлүөнэ кэнсиэрдэрэ үрдүк таһымнаахтык бардылар. Бииртэн биир үчүгэй нүөмэрдэр, саҥа талааннар таҕыстылар”, — диэн кэпсээтэ “Тускул” култуура киинин уус-уран салайааччыта Альбина Ноговицына.

Саха Өрөспүүбүлүкэтин күнүгэр хомуур оһуохай ыытылынна. Манна кэнсиэр кыттыылаахтара, нэһилиэк олохтоохторо көхтөөхтүк кытыннылар.