Өстөөхтөн былдьаммыт тиэхиньикэ быыстапката аһыллыаҕа

Сэтинньи 4-6  күннэригэр өрөспүүбүлүкэҕэ үһүс төгүлүн ыытыллар «Народ и армия едины» диэн Фашизмы утары пуорум чэрчитинэн, элбэх тэрээһиннэр буолаллар. Ил, Эйэ, Сомоҕолоһуу күнүгэр Илиҥҥи байыаннай уокурук бэрэстэбиитэллэрэ пресс-кэмпириэнсийэни ыыттылар.

Пуорум биир сүрүн былаһааккатынан «Арассыыйа — мин устуоруйам» устуоруйа пааркатыгар »Трофейная техника» быыстапка буолар. Бу быыстапка Илиҥҥи байыаннай уокурук Офицердар түмэл-дьиэлэрин байыаннай-историческай пуондатын эспэнээттэриттэн турар. Маны тэҥэ, фронтан фотографтар, худуоһунньуктар быыстапкалара баар. Бу быыстапка туһунан суруналыыстар ыйыттылар.

Роман Греков, Илиҥҥи байыаннай уокурук бэрэстэбиитэлэ, генерал-лейтенант:
— Маннык быыстапканы тэрийии идиэйэтэ, дьиҥэ, уруккуттан баар. Москваҕа Горькай пааркатыгар быыстапка тура сылдьыбыта. «Кыайыы пуойаһа» бырайыак ситиһиилээхтик ыытыллыбыта. Бу маннык быыстапка билиҥҥитэ дойду үрдүнэн соҕотох — Москваҕа «Патриот» пааркаҕа эрэ турар. Илиҥҥи байыаннай чаас трофейдара элбэхтэр. Саха сиригэр биһиги чааспыт суох, ол эрээри саамай улахан эрэгийиэҥҥэ быыстапкабыт туруохтаах диэн санаалаахпыт. Бу эспэнээттэр өстөөхтөн былдьаныллыбыт, араас дойдуларга оҥоһуллубут тиэхиньикэлэр буолаллар. Бүгүн 2 чаастан быстапка аһыллыыта буолуоҕа.

«72-тааҥканы» аҕалыы өрөспүүбүлүкэ салалтатын көҕүлээһинэ буолар. Саха сирин салалтата Илиҥҥи байыаннай уокуругу кытта быһа сибээс олохтоон, маннык үлэ түмүктээх буолар. Эһиэхэ бэртээхэй түмэл баар. Тиэхиньикэ түмэл тиэргэнигэр туруоҕа. Түөрт бронетранспортер уонна пехота бойобуой массыыната бааллар. Американскай М113 бронетранспортеру Соҕурууҥҥу-Донецкай хайысхаҕа 39-с отдельнай гвардейскай мотострелковай биригээдэ байыастара былдьаабыттара. Маны тэҥэ, французскай, финскэй, украинскай бронетранспортердар бааллар. АХШ-ка оҥоһуллубут М2 «Брэдли» бойобуой массыынаны 14-с отдельнай гвардейскай биригээдэ «Восток» анал бөлөҕүн байыастара былдьаабыттара, — диэн кэпсээтэ.

Ыччат миниистирэ, анал байыаннай дьайыы кыттыылааҕа Петр Шамаев: «Биһиги бары Кыайыыга эрэллээхпит, туох баар күүспүтүн уурабыт. Онуоха дьон санаатын, күүһүн сомоҕолуур  маннык тэрээһиннэр, быыстапкалар төһүү буолаллар.  Уолаттарбыт этэҥҥэ эргиллэн кэлэллэригэр эрэ баҕарабыт», — диэн эттэ.