Эстрада ырыаһыта Байбал Сэмэнэп Москваҕа «Рубеж героев» испэктээккэ оонньуоҕа

Олунньу 23 күнүгэр Москваҕа Улуу Кыайыы 80 сылыгар аналлаах «Рубеж героев» диэн Аҕа дойдуну көмүскээччилэр күннэригэр анаммыт испэктээк буолуоҕа.

Бу туһунан Саха эстрадатын тыйаатырын дириэктэрэ Татьяна Чаранская маннык сырдатта:

— Суруйааччы Василь Быков  «Третья ракета» сэһэнинэн испэктээк дьиҥнээх буолбут түбэлтэҕэ олоҕурар. Василь Быков  испэктээккэ кэпсэнэр бойобуой сорудахха кыттыбыт эбит. Онно кини Өймөкөөнтөн сылдьар Попов диэн саллаат хорсун быһыытын кэпсиир.  Аата биллибэт. Сэһэҥҥэ араспаанньатынан эрэ ахтыллар. Өймөкөөн Поповун оруолун СӨ үтүөлээх артыыһа Байбал Сэмэнэп арыйар. Попов Кыайыы иһин олоҕун толук биэрэр.

Устуоруйа хатыланар. Биһиги кэммитигэр саха уолаттарын байыаннай дьайыыга дьоруойдуу быһыылара онуоха холобур — аатырбыт Тутаны ылан көрүөҕүҥ. Онон Москватааҕы  «Поколение» драматическай музыкальнай тыйаатыр уонна Саха эстрадатын  тыйаатыра холбоһуктаах испэктээктэрэ көрөөччү сэҥээриитин ылара чахчы. Испэктээк режиссёра Руслан Киршин туруорар испэктээгэр бэлэмнэнэн, саха эстрадатын чаҕылхай артыыһа Байбал Сэмэнэп бу күннэргэ айар үлэ үөһүгэр сылдьар.