Билиҥҥи кэмҥэ тыа сирин сайыннарар, кэскилин кэҥэтэр туһунан элбэхтик толкуйдуур, кэпсэтэр буоллубут. Маныаха тыа сиригэр олорон, сүөһү-ас тутан, уйгуну уһансар хоһуун үлэһит дьоммут туһунан кэпсиир тоҕоостоох дии саныыбын.
Мин бүгүн кэпсиир киһим — Соколов Вячеслав Владимирович, Мэҥэ Хаҥалас Хочо бөһүөлэгин олохтооҕо, бааһынай хаһаайыстыба баһылыга, Чечняҕа бойобуой дьайыылар кыттыылааҕа. Вячеслав Соколов 1977 сыллаахха ыам ыйын 25 күнүгэр Абый оройуонугар Кэбэргэнэ бөһүөлэгэр төрөөбүтэ.
Сэбиэскэй Аармыйа кэккэтигэр Омскайга сулууспалаабыта. 16-с нүөмэрдээх ПТУ-ну бүтэрэн ювелир идэтин ылбыта. 1998 сыллаахха олоҕун доҕорун Куприянова Татьяна Николаевнаны көрсөн, ыал буолбута. Эдэр ыал Хочоҕо олохсуйбуттара. 2007 сылтан сүөһү тутан, бааһынай хаһаайыстыба буолбуттара. Пилорама тэриммитэ, грант көмүскээн, МТЗ- 82 тыраактар ылыммыта, сүөһүтүн ахсаанын элбэтэн, улахан хотон туттубута.
Вячеслав Владимировичтаах дьиэ кэргэнинээн уопсастыбаннай олох инники күөнүгэр сылдьаллар. Дьиэ кэргэн аҕа баһылыга мас-рестлининэн, ийэлэрэ Татьяна Николаевна волейболунан, улахан кыыс Анастасия мас-рестлининэн, кыра кыыс Дария, уоллара Сокол чэпчэки атлетиканан дьарыктаналлар. Түөлбэ, нэһилиэк, улуус чиэһин араас таһымнаах күрэхтэргэ көмүскүүллэр. Саамай үрдүк көрдөрүүлээх спортсменкалара Настя ХИФУ ГРФ-ны бүтэрэн, билигин Аллараа Бэстээххэ «Парус» спорткомплекска инструкторынан үлэлиир, Чурапчытааҕы ЧИФКИС-кэ магистратураҕа иккис кууруска кэтэхтэн үөрэнэр, СӨ мас-рестлиҥҥэ маастара, өрөспүүбүлүкэ, Арассыыйа таһымыгар ситиһиилэрдээх.
Кыра кыыс Даша хотугу многоборьеҕа СӨ маастарга кандидата, кэргэннээх, икки оҕолоох. Аҕа туйаҕын хатарааччы Сокол аармыйаттан кэлэн баран, үөрэҕин үрдэтинэ сылдьар. Чэпчэки атлетикаҕа үһүс разрядтаах. Вячеслав Владимирович уолунаан Соколлыын өрөспүүбүлүкэтээҕи «Аҕа уолунаан» күрэҕэр үстэ субуруччу бастааннар, абсолютнай чөмпүйүөн аатын ылбыттара.
В.В.Соколов быстах хомуур бастакы күннэригэр бэбиэскэ тутан, сүөһүтүн-аһын дьаһайбакка, эмискэ баҕайы анал эппэрээсийэҕэ аттаммыта. Украина Херсон куоратыгар бойобуой дьайыыларга кытта сылдьан, араанньы буолан, билигин Москва куорат Вишнёвскай аатынан байыаннай госпитальга сытар. Бу күннэргэ эппэрээсийэлэммит буолуохтаах. Биһиги бастыҥ баҕабыт диэн Вячеслав Соколов этэҥҥэ буолан дойдутугар эргиллэн кэлэригэр.
Елена Прокопьева, уопсастыбаннай кэрэспэндьиэн.
Быыбар күнүн бастакы түмүктэрин хотугулуу-илиҥҥи улуустар биэрэллэр. Муома улууһун Соболоох нэһилиэгин баһылыгын быыбарыгар барыллаан ааҕыынан,…
Александра Григорьева-Сандаарыйа «Күн тахсыыта» диэн ааттаан саҥа кинигэни бэлэмнээбитин умсугуйан туран аахтым, уһуну-киэҥи толкуйдаатым, уруккуну-хойуккуну…
Бүгүн, балаҕан ыйын 14 күнүгэр, Дьокуускай куорат күнүгэр, Аҕа дойду Улуу сэриитин кыттыылааҕа, Дьокуускай куорат…
Бу киэһэ 18:00 ч дааннайынан, быыбардааччылар 38,99% куоластаата. Улуус баһылыктарын быыбарыгар: Өлөөн оройуона – 60,26%,…
Арыгы атыыта бэрээдэктээһин, сымыйа кафелары уонна «наливайкалары» утары охсуһуу салҕанарын туһунан Дьокуускай куорат мэрэ Евгений…
Хаҥалас улууһун 627 №-дээх быыбардыыр учаастакка Валерий Аркадьевич уонна Галина Акимовна Тетериннэр дьиэ кэргэннэрэ куоластаата.…