Этиһэ туран төлөпүөнү муостаҕа бырахпыт

Ленскэй оройуонун полициятыгар олохтоох дьахтар көмө көрдүү тиийбит. Кини кыыһын төлөпүөнүн алдьаппыттарын туһунан иһитиннэрбит. Хоромньу уопсай суумата 20 тыһ. солк. тэҥнэспит.

Бэрэбиэркэ кэмигэр участковайдар уонна сокуоннай саастарын туола илик оҕолор дьыалаларын үлэһиттэрэ уорбаланааччыны быһаарбыттар. Бу 17 саастаах уол эбит.

Уорбаланааччы уол уонна эмсэҕэлээбит кыыс элбэх кыбартыыралаах дьиэҕэ улаханнык этиспиттэр. Этиһэр кэмнэригэр кыыс уорбаланааччы ийэтин туһунан куһаҕаннык саҥарбыт. Онуоха уол кыыс гаджетын ылан туох баар күүһүнэн муостаҕа бырахпыт.

Холуобунай кодекс 167 ыст., 1 ч. (“Баайы-дуолу соруйан алдьатыы”) холуобунай дьыала тэриллибит. Ити туһунан СӨ ИДьМ пресс-сулууспата иһитиннэрэр.