Этиҥинэн күнү-дьылы билгэлииллэр

От ыйыгар өҥүрүк куйаас түһэр кэмэ, окко киирии кэмэ, сир аһа ситэр. От ыйыгар маннык билгэлэр бааллар.

От ыйын 3 күнүгэр самыырдаатаҕына – 40 хонуктаах ардах түһэр.

От  ыйын 6 күнүттэн эмтээх оту хомуйуу саҕаланар.

От ыйын 10 күнүгэр ардах түстэҕинэ – 14-кэ диэри ардыыр. Оттон кураан күн буоллаҕына – кураарар.

От ыйын 12 күнэ – Бөтүрүөп. Бөтүрүөп ардаҕа. Окко киирэллэр. Хортуоппуй, кирээдэ сыыс отун ыраастыыллар, буорун көбүтэллэр.

От ыйын 14 күнүгэр былыр отчуттар ходуһаҕа киирэр күннэрэ.

От ыйын 21 күнэ – Борокуоппайап. Дьэдьэн, хаптаҕас, сугун буһар. Кус оҕото ситэр.

От ыйын 25 күнүгэр – сиик түһүүтэ элбэх буоллаҕына, ол күн кураан буолар.

От ыйын 26 күнэ – ый туолуута. Борокуоппайап ааһыар диэри кэҕэ эттэҕинэ, үчүгэй сайын турар.

От ыйын 29 күнүттэн чыычаах күргүөмнээх тойуга уурайар.

От ыйыгар элбэхтик этиҥниир. Манан эмиэ ардаҕы, курааны билгэлииллэр эбит. Холобур, этиҥ бүтэйдии этэн ньиргийэр буоллаҕына, ардах бытааннык түһэр. Этиҥ этиитэ күүһүрдэҕинэ, ардах ыаҕастаах уунан тоҕо түһэр. Уһуннук иҥиэттэн эттэҕинэ – ардахха, оттон быһа тардан этэр буоллаҕына – кураан күҥҥэ.