Хаартыска: национальнаяполитика.рф
Бүтүн Арассыыйатааҕы «Улахан этнографическай дьыктаан» сырдатар аахсыйа сэтинньи 1-8 күннэригэр буолуоҕа. Быйыл онус төгүлүн ыытыллар дьыктаан Улуу Кыайыы 80 сылыгар уонна Аҕа дойдуну көмүскээччи сылыгар ананыаҕа.
Саха сиригэр этнографическай дьыктаан 300 былаһаакканан ыытыллыаҕа. Маны тэҥэ, кыттааччылар бу былаһааккаларга кэлэн уонна дьиэлэриттэн олорон, онлайн көрүҥүнэн эмиэ суруйар кыахтаахтар. Сиһилии информацияны национальнаяполитика.рф саайтан булуохха сөп.
Норуот сомоҕолоһуутун күнүгэр Өксөкүлээх Өлөксөй аатынан Норуоттар доҕордоһууларын дьиэтигэр, «Арассыыйа — мин устуоруйам» мультимедийнэй пааркаҕа, Омук дьонун социальнай уонна култуурунай адаптацияларын киинигэр дьыктааны суруйуохтара. Атын күннэргэ бибилэтиэкэлэргэ, үөрэх, култуура тэрилтэлэригэр ыытыллыахтара.
Тас сибээстэргэ, норуоттар дьыалаларыгар миниистир Гаврил Кириллин этэринэн, Саха сирэ уруккуттан да Этнографическай дьыктааҥҥа көхтөөхтүк кыттар. 2017 сыллаахха саамай элбэх кыттааччылааҕынан Арассыыйаҕа иккис миэстэни ылбыта. Онно 10 тыһыынча киһи кыттыбыта. Бэл, Өймөкөөҥҥө таһырдьа тымныыга олорон, дьыктааны суруйан, үгүс дьону сөхтөрбүттэрэ, устуоруйаҕа киирбиттэрэ.
Оттон быйылгы дьыктаан уратыта — Норильскай-Москва хайысханан көтөн иһэр NordStar авиахампаанньа сөмөлүөтүгэр олорсубут 180 пассажир дьыктааны суруйан, устуоруйаҕа киириэхтэрэ. Аҕа дойдуну көмүскээччи сылыгар, «Народы России и СНГ» бэстибээл чэрчитинэн, байыаннай дьайыы кыттыылаахтара Москва киин былаһааккатыттан бэйэлэрин ыйытыыларын видеонан биэрэр кыахтаныахтара. Маны тэҥэ, Антарктидаҕа баар полярнай ыстаансыйалар үлэһиттэрэ холбонуохтара.
2024 сыллаахха Саха сиригэр 30 тыһыынча киһи кыттыбыта, онон кыттааччы ахсаанынан Уһук Илиҥҥэ 1-кы миэстэҕэ тахсыбыта, Арассыыйаҕа 30 бастыҥ иһигэр киирбитэ.
Дьыктаан түмүгэ ахсынньы 12 күнүгэр, Арассыыйа Конституциятын күнүгэр биллиэҕэ.
«Улахан этнографическай дьыктааҥҥа» ким баҕарар кыттыан сөп. Арассыыйаҕа олорор норуоттар тылларын, үгэстэрин, култуураларын, устуоруйаларын туһунан ыйытыыларга хоруйдуугун, бэйэҥ билиигин тургутан көрөҕүн. Маны тэҥэ, бүтүн дойду кыттар сүҥкэн аахсыйаҕа кыттыһарыҥ эмиэ улахан суолталаах. Ол түмүгэр, Арассыыйаҕа олорор норуоттар тустарынан элбэҕи билэҕин.
Ахсынньы 19 күнэ -- Кыһыҥҥы Ньукуолун. Кыһыҥҥы Ньукуолуҥҥа үгэс быһыытынан алаадьылыыллар. Бу ыйга дьон үксүгэр…
Арассыыйа Бэрэсидьиэнэ Владимир Путин быһа лииньийэни кытта холбоһуктаах улахан пресс-кэмпириэнсийэтэ бүгүн Москваҕа Гостинай дворга буолуоҕа.…
Быйыл Горнай улууһугар Бэрдьигэстээххэ "Эйэ" түөлбэ тэриллибитэ түөрт сылын туолла. Бу 4 сыл тухары биһиги…
Өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһин дэлэгээттэрин ортотугар ыччат дьокутаат элбээн эрэрэ хайҕаллаах…
Бу күннэргэ акыйаан уҥуор балаһыанньа сытыырхайан эрэр. АХШ бэрэсидьиэнэ Эмиэрикэ бобуутугар түбэспит танкердары Венесуэлаҕа киллэрбэппит-таһаарбаппыт,…
Чэгиэн-чэбдик буолуҥ! Сарсыарда уһуктаат маны оҥор. Этэллэринэн, бу эрчиллиилэр мэйии, харах быччыҥнарын сайыннараллар. 4-5 төгүл үөһэ-аллара,…