“Эвэды тылын уйата”: Нордголд хампаанньа эбэҥки тылын сайыннарар бырагырааманы үбүлээтэ

Өрөспүүбүлүкэ эбэҥкилэрин түмсүүтэ “Нордголд” хампаанньа көмөтүнэн “Эвэды тылын уйата” бырагырааманы олоххо киллэриитин саҕалаата.

Соторутааҕыта Дьокуускайга «Цифровой алмаас» пуорум буола турар күннэригэр Өлүөхүмэ улууһун Бэс Күөл уонна Тээнэ сэлиэнньэлэригэр оптоволокнолаах сибээс лииньийэлэрэ үлэҕэ киирбиттэрэ. Бу маны эмиэ “Нордголд” хампаанньа үбүлээбитин санатар тоҕоостоох. Билигин бырагырааманы олоххо киллэрии түргэн интэриниэт киирбит сиригэр Тээнэҕэ саҕаланыаҕа.

Бырайыак ааптара, тыл билимин дуоктара, СӨ эбэҥкилэрин Ассоциацияларын бэрэссэдээтэлэ Александр Варламов эппитинэн, Саха сиригэр олорор эбэҥкилэр тылларын балаһыанньата ыарахан кэрдиискэ кэлэн турар — уопсай ахсаантан 4-5%-тан тахса эрэ киһи төрөөбүт тылынан саҥарар, төрөөбүт тылларынан көннөрү кэпсэтэр эбэтэр суруйар таһымнаах дьон ахсаана 11%-тан тахсыбат.

СӨ эбэҥкилэрин өрөспүүбүлүкэтээҕи ассоциацията «Эвэды тылын уйата» бырагырааманы үбүлүүргэ соруммут «Нордголд» хампаанньаҕа махталын биллэрэр.