Эвелина Егорова: «Патриот» киин ыччат түмсэр сиринэн буолуоҕа»

Бүгүн Дьокуускайга «Патриот» ыччат киинин үөрүүлээх аһыллыыта буолан ааста. Бу аныгы кэм ыччатын сайдар, үүнэр, саҥаны билэргэ-көрөргө дьулуһар киининэн буолуоҕа.

«Бастакылар» хамсааһын чилиэнэ, көхтөөх ыччат Эвелина Егорова «Патриот» ыччат киинин аһыллыытын туһунан санаатын үллэһиннэ:

— “Патриот” киин аһыллыыта олус кэрэхсэбиллээхтик, өрө күүрүүлээхтик саҕаланна. Биир тылынан эттэххэ, олус үчүгэй тэрээһин буолан ааста. Барыта орун оннугар оҥоһуллубут тэрээһин дии санаатым. Ил Дархан, дьокутааттар, дьоруойдар, о.д.а. бас-көс дьон кэлэн кытыннылар. Биһиги волонтердар буолабыт. Волонтердар бу киин үлэҕэ киирэригэр көмөлөспүппүт. Барыта этэҥҥэ ааста, киин аһылынна. Оҕоҕо, ыччакка аналлаах манна элбэх, холобур, тренажернай саала, роллердром, коворкинг хостор, видеолары уонна подкастары уһуллар устуудьуйалар, йога уонна үҥкүү уруоктара, успуорт саалата, айар устуудьуйалар, о.д.а. Биһиги курдук оҕолорго бириэмэлэрин туһалаахтык атаарарга бары усулуобуйа оҥоһуллубут. Мантан инньэ «Патриот» киин ыччат түмсэр сиринэн буолуоҕа. Онон бары оҕолору, ыччаты үлэҕэ киирбит саҥа «Патриот» ыччат киинигэр ыҥырабын.