Эверест чыпчаалыгар тиийбит Евгений Кривошапкиҥҥа «Гражданскай килбиэн» бэлиэни туттардылар

Бүгүн, ыам ыйын 25 күнүгэр,  «Муус хайа» култуурунай-саататар киинигэр киин куорат уопсастыбаннаһа аан дойду саамай үрдүк хайатыгар Эвересткэ тахсыбыт бастакы саханы, Өймөкөөн улууһун олохтооҕун Евгений Кривошапкины чиэстээтэ.

Тэрээһиҥҥэ 200-чэкэ киһи муһунна. Кинилэртэн үгүстэрэ альпинистар, айанньыттар, чөл олоҕу тутуһааччылар.

Эҕэрдэ тыл бастыҥын этэн туран, СӨ Ил Дарханын уонна Бырабыыталыстыбатын дьаһалтатын салайааччы Георгий Михайлов Евгений Кривошапкиҥҥа «Гражданскай килбиэн» бэлиэни туттарда.

Евгений оҕо сааһын доҕотторо, биир дойдулаахтара, табаарыстара, туризмы көҕүлээччилэр эҕэрдэ, сөҕүү-махтайыы тылларын эттилэр, баҕа санааларын тиэртилэр.