Евгений Федоров: «Быыбар систиэмэтин актуальнай боппуруостарын тула кэпсэтиэхпит уонна уопуппутун атастаһыахпыт»

Бүгүн СӨ Киин быыбардыыр хамыыһыйата М.К. Аммосов аатынан Хотугулуу-илиҥҥи федеральнай университеты кытары бииргэ «Актуальные вопросы избирательного права и процесса: практика и перспективы» Бүтүн Арассыыйатааҕы научнай-практическай кэмпэриэнсийэ төгүрүк остуолун ыытта.

СӨ Киин быыбардыыр хамыыһыйатын бэрэссэдээтэлэ Евгений Федоров кэмпэриэнсийэ тэрээһинин туһунан санаатын үллэһиннэ:

— Арассыыйа быыбардыыр систиэмэтин 30 сылынан маннык тэрээһини ыытарга быһаардыбыт. Бүгүҥҥү кэмпириэнсийэбитигэр 100-кэ киһи кыттар, уопсайа 32 киһи быыбар туһунан дакылаат оҥороро былааннанар. Москваттан, Саратовтан, Тюменьтэн, тыл этиэхтэрэ. Ону тэҥэ Ненецкэй автономнай уокуруктан быыбар хамыыһыйатын бэрэсэдээтэлэ Иван Макаров кэлэн кытта сылдьар. Номнуо иккис күнүн биһиги кинини кытары үлэлиибит. Элбэх кыһалҕалаах боппуруоска санаабытын атастастыбыт. Кэлэр нэдиэлэҕэ Арассыыйа киин быыбардыыр хамыыһыйатын таһымыгар улахан мунньах буолуохтаах. Ол иннинэ биһиэхэ буола турар научнай-практическай тэрээһиҥҥэ онно аналлаах биир тиэмэни дьүүллэһиэхпит. Бүгүҥҥү тэрээһиҥҥэ быыбар быраабын интэриэһиргиир устудьуоннар, уопсастыбаннай тэрилтэлэр, бэлитиичэскэй баартыйалар бэрэстэбиитэллэрэ кытта сылдьаллар. Ону сэргэ өрөспүүбүлүкэ 25 улууһуттан видеоконференция сибээһинэн холбонон кыттыахтара. Олус туһалаах тэрээһин буолуо диэн эрэнэбит. Билиҥҥи кэмҥэ быыбар систиэмэтигэр үөскээбит актуальнай боппуруостар тула кэпсэтиэхпит уонна уопуппутун атастаһыахпыт.