Евгений Григорьев «Книжный ветер» кинигэ дьаарбаҥкатын бэлэмин билистэ

Санатар буоллахха, бу улахан түһүлгэ бэс ыйын 27-28 күннэригэр Дьокуускай куорат киин бибилэтиэкэтин ситимин көҕүлээһининэн ыытыллыаҕа. Билиҥҥи туругунан норуоттар икки ардыларынааҕы дьаарбаҥкаҕа 40 кинигэ кыһата уонна бэчээттэммит оҥоһугунан эргинэр тэрилтэ кыттарга баҕатын биллэрбит.  Киин куорат бибилэтиэкэтин ситимин дириэктэрэ Ньургуйаана Решетникова Евгений Григорьевка дьаарбаҥканы тэрийии хаамыытын билиһиннэрдэ:

– «Книжный ветер» дьаарбаҥка икки күн устата 11:00 чаастан 19:00 чааска диэри үлэлиэҕэ. Сүрүн тэрээһиннэр П.А. Ойуунускай пааматынньыга турар болуоссатыгар уонна Н.Д. Неустроев аатынан SMART-бибилэтиэкэҕэ буолаллара торумнанар. Болуоссакка кинигэ кыһалара уонна маҕаһыыннара атыыны-тутууну тэрийиэхтэрэ. Ону тэҥэ маастар-кылаастар, күрэхтэһиилэр уонна суруйааччылары кытта көрсүһүүлэр ыытыллыахтара. Оттон кинигэ таһарааччыларга, суруйааччыларга уонна библиотека үлэһиттэригэр аналлаах дискуссия түһүлгэтэ уонна стратегиялыы сессия SMART-бибилэтиэкэҕэ буолуоҕа.

Дьаарбаҥка биир бэлиэ түгэнинэн бэс ыйын 27 күнүгэр буолар саха номохторугар олоҕуран суруллубут «Солнце в силках» фэнтези ааптара Марина Сычевалыын көрсүһүүнү ааттыахха сөп. Кини эдэр литератордарга идэни үрдэтии уонна ааҕааччы киэҥ араҥатыгар тахсыы туһунан сэһэргиэҕэ, «Идеяттан кинигэҕэ диэри» маастар-кылааһы ыытыаҕа. Ону сэргэ кыра оҕолорго аналлаах оонньуулар уонна күрэхтэһиилэр, ыччакка туһаайыллыбыт маастар-кылаастар тэриллиэхтэрэ. Тэрээһин туһунан чахчылары дьаарбаҥка буоларын саҕана анал сайтан сиһилии билсиэххэ сөп.

– «Книжный ветер» норуоттар икки ардыларынааҕы дьаарбаҥка Дьокуускай куорат дьаһалтатын уонна Ыччат Арассыыйатааҕы судаарыстыбаннай бибилэтиэкэтин өйөбүллэринэн ыытыллар. Аҕа баһылыкпыт Евгений Николаевичка биһиги бырайыакпытын тус өйөбүлүн иһин махтанабыт. Бу тэрээһин кэлин Арассыыйаҕа кинигэ эйгэтин бөдөҥ түһүлгэтигэр кубулуйуо уонна Саха сирин култууратыгар чаҕылхай көстүүнэн буолуо диэн эрэнэбин. Кэнчээри ыччаты кинигэҕэ тапталга уһуйуу – бу сырдык сорук. Биһиги ону ситиһиэхпит дии саныыбын, – диэн эрэл тылларынан түмүктүүр иһитиннэриитин Дьокуускай куорат киин бибилэтиэкэтин ситимин дириэктэрэ Ньургуйаана Решетникова эттэ.

Дьокуускай куорат баһылыга Евгений Григорьев көрсүһүү түмүгүнэн норуоттар икки ардыларынааҕы дьаарбаҥка кэмигэр бэрээдэги хааччыйарга уонна куттал суох буолуутун бары ирдэбиллэрин тутуһарга туһааннаах сорудах биэрдэ.