Евгений Григорьев уонна «Саха тыла 400»: Саха тылын сайыннарыыга саҥа хардыылар

Дьокуускай куорат баһылыга Евгений Григорьев саха тылын харыстыыр уонна сайыннарар сыаллаах «Саха тыла 400» уопсастыбаннай хамсааһын активистарын кытта көрүстэ. Тэрээһиҥҥэ баһылык социальнай боппуруостарга солбуйааччыта Владимир Аржаков уонна уокуруктааҕы дьаһалта салааларын салайааччылара кыттыыны ыллылар.

Көрсүһүүгэ хамсааһын кэнники үс сыллааҕы үлэтин түмүктэрэ таһаарылыннылар, саха тылын куорат олоҕор киллэриигэ салгыы хардыылар дьүүллэһилиннилэр. Бу туһунан Дьокуускай куорат мэриятын пресс-сулууспата иһитиннэрэр.

Биир сүрүн бырайыагынан «Сырдатар маршрут» буолла. Бырайыак чэрчитинэн 70-тан тахса оптуобус тохтобула Саха сирин биллиилээх дьонун – суруйааччыларын, учуонайдарын, бэлиитиктэрин уонна уопсастыбаннай диэйэтэллэрин этиилэринэн киэргэтилиннэ. Этиилэртэн быһа тардыылар сахалыы уонна нууччалыы тылынан оҥоһулуннулар, бу көҕүлээһини куорат олохтоохторугар киэҥ араҥатыгар тиийимтиэ оҥорор уонна өрөспүүбүлүкэ култуурунай нэһилиэстибэтин кытта билиһиннэрэргэ көмөлөһөр. Бу бырайыак куорат дьаһалтата уонна уопсастыбаннас таһаарыылаахтык бииргэ үлэлээһиннэрин чаҕылхай холобурунан буолла. Ону таһынан, быйыл активистар ВЭБ.РФ уонна «Үлэ кыбаарталын» кытта саҥа «Суол» диэн култуурунай-сырдатар бырайыагы үлэлэттилэр.

Оптуобустарга туруоруллубут QR-кодтар көмөлөрүнэн пассажирдар икки судаарыстыбаннай тылынан бэриллибит Туймаада хочотун үһүйээннэрин истэр кыахтаннылар. Үһүйээннэри саҥардыыга Евгений Григорьев бэйэтэ кыттыбыта, кини саха тылын харыстааһыҥҥа уонна тарҕатыыга тус интэриэһин бигэргэтэр.

Көрсүһүү кэмигэр активистар куоракка тылы салгыы сайыннарар хас да саҥа көҕүлээһини киллэрдилэр. Ол иһигэр: уокуруктааҕы дьаһалта үлэһиттэрин кыттыылаах хоһоону ааҕыыны ыытыы, стратегическай быһаарыылары оҥорон таһаарарга ыччаты түмэн форсайт-сессиялары тэрийии, ону тэҥэ саха тылын тарҕатыынан дьарыктанар исписэлиистэргэ стратегическай сессияны ыытыы. Итини кытта, нэһилиэнньэ билиитин таһымын үрдэтэр сыалтан саха тылын куурустарын тэрийии суолтата бэлиэтэннэ, ону тэҥэ оҕолору төрөөбүт тылга уонна култуураҕа эрдэттэн уһуйарга оҕо лааҕырдарын уонна этно-култуурунай сынньалаҥ бырагыраамаларын тэрийии туһунан санаалар этилиннилэр.

Туспа болҕомто оптуобус тохтобулларыгар иһитиннэрэр систиэмэҕэ саха тылын киллэриигэ, ону тэҥэ куорат дьиэлэригэр уонна уулуссаларыгар икки тыллаах аадырыстар ыйынньыктарын туруорууга урут ылыллыбыт миэрэлэри олоххо киллэриигэ уурулунна. Евгений Григорьев маннык бырайыактар олохтоохтор болҕомтолорун тардар эрэ буолбакка, көлүөнэ ыччаты төрөөбүт тылга тапталы иитиигэ көмөлөһөллөрүн, тылга болҕомтону үрдэтиигэ ураты суолталаахтарын бэлиэтээтэ. Кини кыһаллар куорат олохтоохторун саха тылын харыстааһыҥҥа уонна сайыннарыыга туһуламмыт көҕүлээһиннэри көхтөөхтүк өйүүргэ ыҥырда. Активистар буолбут көрсүһүү саҥа, суолталаах бырайыактары олоххо киллэриигэ күүстээх төһүү буолуо диэн эрэнэллэр.