Евгений Григорьев мээр дуоһунаһыгар болдьоҕо эһиил муус устарга бүтэр

Суруналыыстары кытта көрсүһүүтүгэр Евгений Григорьев мээр дуоһунаһыгар салгыы үлэлиир былааннааҕын туһунан иһитиннэрдэ.

Ол эбэтэр быыбарга киирсэр хандьыдааттар ортолоругар кини аата эмиэ баар буолуоҕа.

«Өскө мээр дуоһунаһыгар үлэлиирим кыаллыбатаҕына, биир иитиэхтии сылдьар бырайыакпын олоххо киллэрэр санаалаахпын.  Уопсастыбаҕа биллэр, убаастанар артыыс, урбаанньыт табаарыстарбын кытта уол оҕону булка, успуорка уһуйар көһө сылдьар лааҕыры тэрийэр былааннаахпыт. Ордук соҕотох ийэлэр уолаттарын эр киһилии иитэллэригэр көмөлөһүөхпүт. Соҕотох ийэҕэ иитиллэр обургу оҕо, туох кистэлэ кэлиэй, үгүстүк ийэтэ бэйэтин оҥосто, киэргэнэ эрэ олорорун көрөр. Оттон ийэ барахсан уолун эр киһи үлэтигэр баҕарбытын да иһин уһуйар кыаҕа суох. Онон ийэлэриттэн көҥүллэтэн ылан, обургу уолаттары кытта үлэлэһэр социальнай бырайыагы олоххо киллэриэм«, — диэн санаатын үллэһиннэ мээр Евгений Григорьев.

Кини иккис болдьоххо киин куорат баһылыгынан үлэлииригэр улахан уопуту мунньуммутун кэпсээтэ. Биэс сылы быһа үгүс үлэни ыыппытын сиһилии  ырытта.