Евгения Березкина уонна Юлиан Слепцов аан бастаан быыбарга куоластаатылар

Бүгүҥҥүттэн Саха сиригэр 790 бастайааннай уонна 21 быстах кэмнээх быыбардыыр учаастактар Арассыыйа Бэрэсидьиэнин быыбарыгар куоластааһыҥҥа ааннарын арыйдылар.

Үс күнү быһа быыбардыыр учаастактар бары сарсыарда 8:00 чаастан киэһэ 20:00 чааска диэри үлэлиэхтэрэ.

Бүгүн Саха сирин хотугулуу-илиҥҥи алта оройуонугар – Абыйга, Аллайыахаҕа, Муомаҕа, Үөһээ Халымаҕа, Аллараа Халымаҕа, Орто Халымаҕа быыбардыыр учаастактар үлэлэрин бастакынан саҕалаабыттара.

Аллараа Халыма оройуонун кырдьаҕас бөһүөлэгэр Походскайга Евгения Березкина уонна Абый улууһугар Юлиан Слепцов бүгүн аан бастаан быыбарга куоластаатылар. Эдэр быыбардааччылар бэйэлэрин гражданскай иэстэрин төлүү биир бастакынан быыбардыыр учаастакка кэллилэр диэн СӨ Киин быыбардыыр хамыыһыйата иһитиннэрэр.