Ф.Г. Охлопков аатынан оскуола остолобуойун үлэһиттэрэ – Бүтүн Арассыыйатааҕы күрэх лауреаттара

Мэҥэ Хаҥалас улууһун биир бастыҥ үлэлээх Ф.Г. Охлопков аатынан оскуолатын остолобуойун үлэһиттэрэ «Оскуола бастыҥ остолобуойа» Бүтүн Арассыыйатааҕы күрэх лауреаттарынан ааттаннылар.

Ааспыт сылга «Оскуола бастыҥ остолобуойа» өрөспүүбүлүкэтээҕи күрэххэ кыайыылаах тахсан, Арассыыйа таһымыгар Сахабыт сирин аатын көмүскүүр чиэскэ тиксибиттэрэ диэн Мэҥэ Хаҥалас улууһун дьаһалтатын пресс-сулууспата иһитиннэрэр.

Бу күннэргэ оскуола остолобуойун үлэһиттэрэ Мордовия Өрөспүүбүлүкэтин Саранск куоратыгар ситиһиилээхтик күрэхтэһэн кэллилэр. Барыта 75 эрэгийиэнтэн 104 оскуола үлэһитэ күөн көрсүбүтүттэн, докумуон көрөөһүнэ, видеоролик, сарсыардааҥы аһылык быыстапката, төрөппүт ыйытыгар тута хоруйдааһын курдук түһүмэхтэри ааһан, Ф.Г. Охлопков аатынан оскуола остолобуойун үлэһиттэрэ финалга, онтон суперфиналга тахсан лауреат үрдүк аатын сүктүлэр.

«Арассыыйа таһымыгар үлэлэригэр бэриниилээх сыһыаннарын, идэлэрин толору баһылаабыттарын көрдөрбүт Мария Лыткинаҕа, Любовь Лыткинаҕа, Татьяна Марковаҕа, Михаил Семеновка, кинилэргэ күүс-көмө, сүбэ-ама буолбут информатизация эйгэтигэр дириэктэри солбуйааччы Олег Петровка уонна эбии үөрэхтээһин учууталыгар Игорь Игнатьевка улууспут дьонун-сэргэтин ааттарыттан итии-истиҥ эҕэрдэбитин тиэрдэбин. Инникитин даҕаны сылаас, минньигэс аһы астаан, оҕолорбут үөрэҕи-билиини сомсоллоругар кылааккытын киллэрэ туруоххут диэн эрэнэбин!», — диэтэ Мэҥэ Хаҥалас улууһун баһылыга Дмитрий Тихонов.