Ф.Охлопков аатынан турнир призеругар снайпер бинтиэпкэтин туттардылар

Сэбиэскэй сойуус Дьоруойа Федор Охлопков кэриэһигэр ыытыллар ытыыга Бүтүн Арассыыйатааҕы турнир призеругар, байыаннай дьайыыга сылдьар байыаска снайпер бинтиэпкэтин туттардылар. 

Бүтүн Арассыыйатааҕы ытыыга турнир Дьокуускайга «Сулус» ытарга үөрэтэр кииҥҥэ быйыл алтынньыга иккис төгүлүн ыытыллыбыта. Бинтиэпкэни бэлэх ылбыт ытааччы турнирга үрдүк көрдөрүүлэнэн, дойду бастыҥ снайпердарын ахсааныгар киирбитэ.

«Сулус» полигон бэрэсидьиэн боломуочуйалаах бэрэстэбиитэлэ Юрий Трутнев сорудаҕынан тутуллубута. 4 килэмиэтир уһуннаах сиргэ ытар полигон атын ханна да суох. Онон күрэхтэһиилэри ыытарга эрэ буолбакка, ыраахха ытар снайпердары бэлэмнииргэ эмиэ туһуланар.

Ытарга үөрэтэр киини Арассыыйа Дьоруойа Александр Колесов салайар. Манна баҕалаах дьон эрэ буолбакка, уорганнар, анал тэрилтэлэр үлэһиттэрэ квалификацияларын үрдэтиэхтэрэ.

Ытарга үөрэтэр киини тутуу 2022 сыл ахсынньытыттан, бэрэсидьиэн Владимир Путин дойдуга байыаннай-спортивнай бэлэмнээһин уонна патриотическай иитии кииннэрин тутар туһунан сорудаҕын толоруу чэрчитинэн саҕаламмыта.

Ил Дархан, бырабыыталыстыба пресс-сулууспата.