Фашизмы утары өрөспүүбүлүкэтээҕи пуорум түмүктэннэ

Сэтинньи 4-6 күннэригэр Дьокуускайга ыытыллыбыт «Норуот уонна аармыйа түмсүүлээхтэр» үһүс өрөспүүбүлүкэтээҕи фашизмы утары пуорум пленарнай мунньаҕынан түмүктэннэ.

Ил Дархан Айсен Николаев байыаннай сулууспалаахтар, бойобуой дьайыылар бэтэрээннэрин, волонтердар уонна активистар иннилэригэр, бүгүн дойдубут аҕа көлүөнэлэр уопуттарыгар, муударастарыгар наадыйар диэтэ.

Өрөспүүбүлүкэ баһылыга Саха сирэ байыастарга бастакыттан өйөбүл буолбутун санатта, бу үлэ сүрүн хайысхаларын ыйда. Айсен Николаев Украина нацистарын уонна кинилэр наймылаһааччыларын тоһутар туһугар саллааттарга көмөнү улаатыннарыы наадатын эттэ.

Ил Дархан байыаннай дьайыы бэтэрээннэрэ үтүөрүүлэрин уонна гражданскай олоххо төннүүлэрин сүрүн сорук быһыытынан ааттаата. Хас биирдии байыас бочуокка, ытыктабылга, оттон кинилэр дьиэ кэргэттэрэ кыһамньыга, өйөбүлгэ сылдьыахтаахтар диэтэ. Эрэгийиэн байыаннай сулууспалаахтарга уонна кинилэр дьиэ кэргэттэригэр биир кэмнээх төлөбүрү, чэпчэтиилэри уонна да атын көмөнү оҥорор, уопсайа 33 федеральнай, 44 эрэгийиэннээҕи, 7 муниципальнай өйөбүл миэрэлэрэ үлэлииллэр.

Өрөспүүбүлүкэ баһылыга ыччаты патриотическай иитиигэ байыаннай дьайыы бэтэрээннэрин кытыннарар наадалааҕын тоһоҕолоото.

Саха сирэ 2022 сыллаахха Арассыыйаҕа биир бастакынан патриотическай иитии туһунан сокуон ылыммыта. Айсен Николаев дааннайынан, аҥардас 2025 сылга патриотическай иитии тэрээһиннэригэр  240 000-тан тахса эдэр дьон кыттыбыттар. Быйыл Ил Дархан байыаннай дьайыы кыттыылаахтарын үйэтитэр хамыыһыйа үлэтин бигэргэтэр дьаһала таҕыста.

Маны таһынан, Ил Дархан ураты болҕомтону байыаннай-спортивнай бэлэмҥэ уурда, ол туһугар эрэгийиэҥҥэ анал инфраструктура оҥоһуллар уонна бөҕөргөтүллэр. Өрөспүүбүлүкэтээҕи кадеттар оскуолаларыгар анаан саҥа дьиэ тутулунна, патриотическай иитии бары көрүҥнэрин координациялыыр «Патриот» ыччат киинэ аһыллаары турар. Снайпердары бэлэмнииргэ бары усулуобуйа тэриллибит «Сулус» киин үлэлээбитэ үс сыл буолла. «Воин» киин салааларын кэккэтэ хаҥыы турар.

Айсен Николаев пленарнай мунньахха байыаннай дьайыы кыттыылаахтарыгар РФ судаарыстыбаннай наҕараадаларын уонна РФ Оборуонаҕа министиэристибэтин наҕараадаларын туттарда.

Пленарнай мунньахха Илиҥҥи байыаннай уокурук хамандыырын байыаннай-бэлитиичэскэй үлэҕэ солбуйааччы генерал-лейтенант Роман Греков тыл эттэ. Илиҥҥи байыаннай уокурук хамандыыра генерал-полковник Андрей Иванаев аатыттан «Восток» бөлөх бу сыл устата бойобуой дьайыыларын түмүктэрин билиһиннэрдэ.

«»Восток» бөлөх 1700 квадратнай килэмиэтири уонна 50 нэһилиэнньэлээх пууну босхолоото. Бу “Восток” кыайыы уопсай дьыалатыгар киллэрбит кылаата, кини кэккэтигэр тыһыынчанан сахалар, эһиги биир дойдулаахтаргыт бааллар», — диэтэ Роман Греков.

Соҕурууҥҥу байыаннай уокурук байыаннай-политическай управлениетын начаалынньыгын солбуйааччы полковник Михаил Досугов фашизмы кыайыыга көмөлөспүт дьоҥҥо Уһук Илин байыаннай уокурук хамандыыра генерал-полковник Александр Санчик аатыттан махтал тылларын тиэртэ.

Фашизмы утары пуорумҥа байыаннай дьайыы зонатыттан кэлбит буойуттар ааттарыттан гранатометнай взвод ыстаарсай наводчига младшай сержант Евгений Серкин тэрээһин кыттыылаахтарын эҕэрдэлээтэ. «Zov Севера» волонтерскай хамсааһын салайааччыта Раиса Кириллова тыл эттэ.

Пуорум кыттыылаахтарыгар РФ бырабыыталыстыбатын бэрэссэдээтэлин солбуйааччы- Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев уонна Арассыыйа Дьоруойа, РФ Үөрэҕин министиэристибэтин департаменын салайааччыта Игорь Юргин өрөспүүбүлүкэ олохтоохторугар видео-эҕэрдэлэрин ыыттылар диэн Ил Дархан, бырабыыталыстыба пресс-сулууспата иһитиннэрэр.