Фашизмы утары III пуорум тэрээһиннэрэ

Сэтинньи 4-6 күннэригэр Дьокуускайга фашизмы утары өрөспүүбүлүкэтээҕи III пуорум буолаары турар.

Дьокуускайга «Норуот уонна аармыйа биир сомоҕо»  пуорумҥа байыаннай дьайыы кыттыылаахтара, бэтэрээннэрэ, ыччаттар түмсүүлэрэ, үрдүк үөрэх кыһаларын уонна иһитиннэрэр-биллэрэр эйгэ бэрэстэбиитэллэрэ түмсүөхтэрэ.

Үүнэр көлүөнэни уонна ыччаты патриотическай тыыҥҥа иитиигэ, устуоруйа өйдөбүлүн харыстыырга сыаллаах-соруктаах тэрээһин фашизм аныгы көстүүлэрин утары охсуһууга тирээн турар суолталаах боппуруостары дьүүллэһэр былаһаакканан буолуоҕа.

Сэтинньи 4 күнүгэр «Лена» киинэ тыйаатырыгар Татьяна Борщ «Вторая мировая. Ложь западных стран» кинохроникатын көрдөрүөхтэрэ. Бу күн Илиҥҥи байыаннай уокурук оробуочай бөлөҕө өрөспүүбүлүкэтээҕи медиа-кииҥҥэ пресс-кэмпириэнсийэни ыытыаҕа.

Сэтинньи 4 күнүгэр биир сүрүн тэрээһининэн «Арассыыйа — мин устуоруйам» устуоруйа пааркатыгар байыаннай дьайыы кэмигэр Арассыыйа байыаннайдара былдьаабыт трофейнай байыаннай тиэхиньикэлэрин быыстапката буолуоҕа. Маны сэргэ, Хабаровскай к. Илиҥҥи байыаннай уокурук Офицердарын дьиэтин байыаннай-устуоруйа түмэлин пуондаларыттан «Хорсун быһыы туһунан өйдөбүл» быыстапка, фронтовой фотокэрэспэдьиэннэр — Ирина Ким, Александр Авдеев, Эдуард Самылин, Сергей Бордачев хаартыскаларын быыстапката, фронтовой худуоһунньук Артем Журавлев үлэлэрин көрдөрүөхтэрэ. Маны сэргэ, ХИФУ КФЕН бу күн «Народ и армия едины» ыччат патриотическай биэчэрэ ыытыллара былааннанар. Өрөспүүбүлүкэ үрдүнэн бу күн байыаннай дьайыы кыттыылаахтарын кытары көрсүһүүлэр, кылаас чаастара ыытыллыахтара, социальнай көмүскэл, доруобуйа харыстабылын тэрилтэлэригэр, волонтердар түмсүүлэригэр,  уо.д.а. сирдэргэ сылдьыахтара.

Сэтинньи 5 күнүгэр «Социально– психологическое сопровождение участников специальной военной операции и членов их семей. Комплекс практических решений» сэминээр, «СВО. Взгляд изнутри» байыаннай кэрэспэдьиэннэри, муниципальнай тэриллиилэр баһылыктарын, үрдүкү салалтаны, биэдэмистибэлэр бэрэстэбиитэллэрин кытары көрсүһүүлэр буолуохтара. Бу күн Ю.А.Гагарин аатынан култуура уонна аныгы ускуустуба киинигэр »  Народ и армия едины» кэнсиэргэ күүтэллэр.

Сэтинньи 6 күнүгэр «Народ и армия едины» фашизмы утары пуорум пленарнай мунньаҕа. Пуорум кыттыылаахтара аан дойдуга фашизм көстүүлэрин утары көдьүүстээх охсуһуу ньымаларын, ыччаты патриотическай иитии боппуруоһун дьүллэһиэхтэрэ. Өрөспүүбүлүкэ болуоссатыгар «Герои и подвиги» быыстапканы көрүөххүт.

Сиһилии: https://www.sakha.gov.ru/news/14867

СӨ Ил Дарханын уонна Бырабыыталыстыбатын пресс-сулууспата