Федерация Сэбиэтэ Өлүөнэ муостатын тутуутун түргэтэтэргэ эттэ

Федерация сэбиэтин уочараттаах мунньаҕар Федерация Сэбиэтин бэрэссэдээтэлэ  Валентина Матвиенко  Өлүөнэ муостатын тутууга паритетнай үбүлээһин схематын  туһунан Ил Дархан Айсен Николаев этиитин өйөөтө.

«Билигин өрөспүүбүлүкэ олохтоохторун сүрүн баҕа санааларынан Өлүөнэ муостатын тутуу буолар. Бу тутууну олохтоохтор бары кэтэһэллэр.  Бу олус наадалаах, тыын суолталаах боппуруос буолан, өрөспүүбүлүкэ баһылыга бырайыагы олоххо киллэриигэ күүскэ үлэлэһэрин бары көрө сылдьабыт. Муоста тутулуннаҕына сылы эргиччи айан-сырыы түөрт төгүл улаатыахтаах.  Биһиги өрөспүүбүлүкэ бу бырайыагын олоххо киириитин күүскэ өйүөхпүт диэн эрэннэрэбин. Кылаабынайа, үбү-харчыны тыырыыга  өрөспүүбүлүкэ кыаҕа учуоттаныахтаах.  Паритетнай буолуохтаах», – диэтэ Валентина Матвиенко.

Үбү-харчыны көрүү  2025 сылга былааннаммыт. Валентина Матвиенко судаарыстыбаннай экспертиза түмүгүн тута ылаат даҕаны, муостаны тутуу үлэтэ саҕаланыахтааҕын эттэ.

«Федеральнай бүддьүөт бырайыагар 2025 сылга киллэриллибитэ. Бу сыл бүтүөр диэри  экспертиза баар буоллаҕына, тутууну саҕалыахха наада», – диэн кини эбэн эттэ.

«Субъект чааһыгар» тыл этэригэр Ил Дархан Айсен Николаев Өлүөнэ муостата Илин Сибиири уонна Уһук Илини ситимниир сүрүн бырайыагынан буолуоҕа диэтэ.

Валентина Матвиенко  өрөспүүбүлүкэ баһылыгын этиитэ Парламент Үрдүкү палаататын СӨ социальнай-экэнэмичэскэй сайдыытын судаарыстыбаннай өйөбүлүн туһунан уурааҕын бырайыагар киириэҕэ диэн эттэ.

Уураах бырайыагынан Федерация Сэбиэтэ РФ бырабыыталыстыбатыгар Өлүөнэ муостатын тутууну «Развитие транспортной системы» судаарыстыбаннай бырагыраама иитинэн кыттыгас үбүлээһини (софинансирование)  оҥорорго сүбэлээтэ.