Арассыыйа норуоттарын култуурунай нэһилиэстибэтин сылын чэрчитинэн, бэҕэһээ, Москубаҕа, РФ Федеральнай Мунньаҕын Федерация Сэбиэтин бэрэссэдээтэлэ В.И. Матвиенко норуот үгэстэрин, култуура уонна устуоруйа пааматынньыктарын, баай этническэй уратытын оннунан хаалларыыга, норуот ускуустубатын киэҥник тарҕатыыга дойду эрэгийиэннэрин салайааччыларын кытта көрүстэ.
Көрсүһүү култуурунай чааһыгар, Арассыыйа култууратын министиэристибэтин “РОСКОНЦЕРТ” ыҥырыытынан, дойду кэккэ эрэгийиэннэрин бастыҥ айар кэлэктииптэрэ түмүстүлэр. Бу дьоһун түһүлгэҕэ С.А. Зверев-Кыыл Уолун аатынан Үҥкүү национальнай тыйаатыра кыттыыта, дохсун ытыс тыаһынан доҕуһуолланна. Кэлэктиип СӨ култууратын үтүөлээх үлэһитэ, Үҥкүү тыйаатырын уус-уран салайааччыта С.П. Бессонова туруорбут “Тойон чороон” дьүһүйүүтүгэр саха норуотун үгэстэрин, сиэрин-туомун итэҕэтиилээхтик көрдөрөн, киэҥ биһирэбили ылла.
Федерация Сэбиэтин бэрэссэдээтэлэ В.И. Матвиенко бу курдук Арассыыйа дириҥ силистээх, баай устуоруйалаах норуоттара бэйэлэрин үгэстэрин, култуураларын илдьэ сылдьалларын тухары, симэлийбэт дьылҕалаахтарын бэлиэтээн туран, норуот ускуустубата дойду эрэгийиэннэрин сомоҕолуур күүһүгэр эрэнэрин эттэ.
Киэҥ сэҥээрииин ылбыт С.А. Зверев-Кыыл Уолун аатынан Үҥкүү национальнай тыйаатыра салгыы, бу ыйга, Арассыыйа култууратын министиэристибэтэ бэлиэ сылы түмүктүүр Киргизияҕа ыытар улахан тэрээһинигэр кыттыаҕа. Манна аан дойдуга аатырбыт, дьоһун билиниини ылбыт Арассыыйа бөдөҥ, айар кэлэктииптэрэ кыттыахтара.
Үҥкүү национальнай тыйаатырын дириэктэрэ А.И. Алексеев бэлиэтииринэн, кэлэктиип маннык улахан суолталаах түһүлгэлэргэ кыттыыта — тыйаатыр өр сыллаах үлэтин үтүө туоһута. Бу – Кыыл Уолун аатынан кэлэктиип саха норуотун ураты тыынын, дириҥ философиятын илдьэ сылдьар, ону киэҥник тарҕатар үрдүк таһыма, маастарыстыбата, норуоту сомоҕолуур күүһүн сырдык мэктиэтэ.
Альбина Тарабукина
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ баһаарынайдарын түмтэ. Бу туһунан…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…