Федерация үбүлээһинэ кыччыа суоҕа

Ааспыт нэдиэлэҕэ Ил Дархан Айсен Николаев Федерация Сэбиэтин мунньаҕар кыттан, Арассыыйа эһиилги бүддьүөтүн сокуонун барылыгар бэйэтин этиилэрин киллэрбитэ, Уһук Илин эрэгийиэннэргэ бэриллэр дотацияны быйылгы таһымынан хаалларарга туруорсубута. СӨ үбүн миниистирин бастакы солбуйааччы Иван Алексеев бэлиэтииринэн, бу уларыйыы үбүлээһин методикатын саҥалыы көрүү түмүгэр киирбит.

Быйыл РФ үбүн министиэристибэтэ эрэгийиэннэр бүддьүөттэрин тэҥнээһиҥҥэ уларытыылары киллэрбитэ. Бу уларыйыылар түмүктэринэн Саха сиригэр федеральнай бүддьүөттэн дотация быһыытынан кэлэр үбүлээһин кыччыахтааҕа.

– Быйыл РФ үбүн министиэристибэтэ үбү ааҕыы методикатыгар уларыйыылар бырайыактарын оҥорон киллэрбитэ. Ол уларыйыыларынан Уһук Илин эрэгийиэннэргэ, ол иһигэр биһиги өрөспүүбүлүкэбитигэр, федеральнай бүддьүөттэн кэлэр дотацията кыччыахтааҕа, – диэн иһитиннэрэр Иван Иванович.

Иван Алексеев бэлиэтииринэн, бүддьүөтү тэҥнээһиҥҥэ эрэгийиэн уратыта хайаатар да учуоттаныллыахтаах.

– Эрэгийиэннэр бүддьүөттэрин тэҥнээһиҥҥэ субъект бэйэтэ төһө дохуоту киллэринэрэ эмиэ тутулуктаах. Өрөспүүбүлүкэбит төһө да бэйэтэ киллэринэр бүддьүөтэ улааппытын иһин, атын эрэгийиэннэри кытары тэҥнээтэххэ, улахан сирдээхпитинэн-уоттаахпытынан, кыстыкпыт кэмэ уһунунан, ороскуоппут элбэх. Ол барыта үбү тыырыы методикатыгар суруллар, салгыы да ити учуоттаныллыахтаах. Ил Дархан Айсен Николаев бу методика уларыйдаҕына Уһук Илиҥҥи эрэгийиэннэр дотациялара лаппа кыччыаҕын туһунан федерацияҕа сурук ыытан турар. Ааспыт нэдиэлэҕэ Федерация Сэбиэтин мунньаҕар бүддьүөтү көрүүгэ Айсен Сергеевич бэйэтинэн кыттан, этиилэрин иһитиннэрбитэ. Кини этиитин РФ үбүн миниистирэ Антон Силуанов, Федерация Сэбиэтин дьокутааттара өйөөбүттэрэ, – диэн этэр кини.

Ил Дархан Айсен Николаев ити мунньахха Уһук Илин эрэгийиэннэргэ бэриллэр дотацияны быйылгы таһымынан хаалларарга туруорсан турар, ону таһынан арҕааҥҥы дойдулар араас хааччаҕы киллэрбиттэрин түмүгэр медицинскэй оборудованиелар ыараабыттарынан, искэн ыарыыны эмтиир диспансер тутуутун түмүктүүргэ эбии үбүлээһини көрөргө эппитэ. Бу этиилэри РФ үбүн миниистирэ Антон Силуанов уонна Федерация Сэбиэтин бэрэссэдээтэлэ Валентина Матвиенко өйүүллэрин биллэрбиттэрэ. Антон Силуанов иһитиннэрбитинэн, дотация уларыйбакка бу сыллааҕы таһымынан ааҕыллыаҕа.