Федеральнай бырагырааманан Саха сирин Арктика оройуоннарыгар өссө 18 медүлэһити үлэҕэ ыллылар

“Земскэй дуоктар” уонна “Земскэй биэлсэр” бырагыраамаларынан Арктика оройуоннарыгар 18 эмчити үлэҕэ ыллылар. Бу туһунан Эбээн Бытантай улууһугар  Бырабыыталыстыба отчуотугар  бастакы вице-премьер Дмитрий Садовников иһитиннэрдэ.

Кини этэринэн, Арктика улуустарыгар 2024 сылга 10 бырааһы уонна 8 биэлсэри ыыппыттар. Чуолаан, Эбээн Бытантай улууһун Баатаҕай Алыыта сэлиэнньэтигэр учаастактааҕы педиатр-быраас баар буолла. 2025 сылга Эбээн Бытантай улууһугар 3 кубуота көрүллүбүт: учаастактааҕы педиатр-быраас, хирург-быраас уонна психиатр-нарколог.

Ону тэҥэ былырыын тус сыаллаах үөрэххэ салгыы оройуон киин балыыһатыгар үлэлииргэ 4 дуогабар түһэрсиллибит. 4 устудьуон М.К.Аммосов аатынан ХИФУ-га уонна Дьокуускайдааҕы медкэллиэскэ үөрэнэллэр.

Оройуоннааҕы киин балыыһаҕа 11 быраас уонна 29 орто медперсонал үлэлииллэр. Быраастарынан хааччыллыы 77,2 %, орто медперсоналынан — 90,6% тэҥнэһэр.

Санаттахха, Саха сиригэр 2024 сылга “Земскэй дуоктар” уонна “Земскэй биэсэр” бырагыраамаларынан 161 мэдиссиинэ үлэһитэ үлэҕэ ылыллыбыт – 90 быраас уонна 71 биэлсэр.

Сэлиэнньэлэргэ уонна куораттыы тииптээх бөһүлэктэргэ үлэлии барар быраастарга биир кэмнээх толуйар төлөбүр кээмэйэ 2 мөл солкуобай, билэсэрдэргэ – 1 мөл солкуобай. Ону тэҥэ 50 тыһыынчаҕа диэри нэһилиэнньэлээх куораттарга үлэлии барар быраастарга 1 мөл солкуобай уонна биэлсэрдэргэ 500 тыһыынча солкуобай көрүллүбүтэ.

Маннык кээмэйдээх толуйууну тыа сирин нэһилиэнньэлээх пууннарыгар, оробуочай бөһүөлэктэргэ эбэтэр куораттааҕы тииптээх бөһүөлэктэргэ үлэлии барар медүлэһиттэр ылаллар.

Төлөбүрү ылыы усулуобуйатынан тыа сиригэр булгуччу көһүү буолбатах. Холобур, судаарыстыба өйөбүлүн мэдиссиинэ кэллиэстэрин уонна үрдүк үөрэх кыһаларын выпускниктара ылыахтарын сөп, үөрэхтэрин бүтэрэн баран регистрациялаах олорор сирдэригэр төннөн үлэлии кэлбит буоллахтарына.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата