Федеральнай иниспиэктэр Нам улууһугар халаан содулун туоратыы үлэтин хаамыытын билистэ

Бэҕэһээ Нам улууһугар Саха сиринээҕи кылаабынай федеральнай иниспиэктэр Евгений Корнеев РФ Бэрэсидьиэнин Уһук Илин бэрэстэбиитэлин боломуочунайын аппараатын кытары тахса сырытта.

Мунньахха СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников уонна өрөспүүбүлүкэ ситэриилээх былааһын судаарыстыбаннай уорганнарын салайааччылара кытыннылар диэн Нам улууһун дьаһалтатын пресс-сулууспата иһитиннэрэр.

Сүбэ мунньахха быйыл сааскы халаан содулугар эмсэҕэлээбит эбийиэктэри чөлүгэр түһэрии үлэлэрин хаамыытын, ону сэргэ ууттан эмсэҕэлээбит дьоҥҥо төлөбүрдэри оҥоруу туһунан кэпсэттилэр.

Тэрээһин иннинэ Нам улууһугар сааскы халаан алдьатыылаах содулун туһунан видеоролик көрдөрүлүннэ.

Санатар буоллахха, быйылгы сааскы халааҥҥа Нам улууһун 13 нэһилиэнньэлээх пууна ууга барбыта, үлүгэрдээх хоромньу тахсыбыта.