Федеральнай Сабантуй үөрүүлээх аһыллыыта Комсомольскай болуоссакка буолуоҕа

Бүгүн Дьокуускай куоракка  үбүлүөйдээх федеральнай ХХІ Сабантуй үөрүүлээх аһыллыыта Комсомольскай болуоссакка 12 чаастан  саҕаланар. 

Бырааһынньык сүрүн тэрээһиннэрэ Дьокуускайга Комсомол болуоссатыгар, ону тэҥэ “Туймаада” стадиоҥҥа уонна Сынньалаҥ пааркатыгар буолуохтара. Сабантуй кэмигэр айар кэлэктииптэр  кэнсиэрдэрэ, киинэлэр, успуорка күрэхтэһиилэр, быыстапкалар, куонкурустар күүтэллэр.

09:00 чаастан “Туймаада” стадиоҥҥа корэш уонна мас-рестлинг күрэхтэһиилэрэ саҕаланнылар.

10:00 чаастан Саха сирин уонна Татарстан тиэргэннэрэ аһыллыахтара. “Маастардар куораттара” бэстибээл саҕаланыаҕа.

13:00 ч.  Дьокуускайга Сынньалаҥ пааркатыгар “Народные игры – душа Сабантуя” саҕаланар. Гиирэ успордугар, армуспуорка, канааты тардыһыыга уо.д.а. ким баҕалаах кыттыан сөп.

Комсомол болуоссатыгар киин сценаҕа тэрээһини түмүктүүр сиэр-туом кэмигэр 16:00 ч. корэш уонна мас-рестлинг кыайыылаахтарын наҕараадалыахтара.

Быйылгы бырааһынньык Улуу Кыайыы 80 сылыгар уонна Аҕа дойдуну көмүскээччи сылыгар ананар.