Федор Охлопков кэриэһигэр ыраахтан ытыыга Бүтүн Арассыыйатааҕы турнир саҕаланна

Бүгүн, Аҕа дойдуну көмүскээччи күнүгэр, Дьокуускай куоракка «Сулус» үөрэтэр-ытар кииҥҥэ Сэбиэскэй Сойуус Дьоруойа Федор Матвеевич Охлопков кэриэһигэр ыраахтан ытыыга Бүтүн Арассыыйатааҕы  турнир аһыллыыта буолла.

— Турниры ыытыы идиэйэтин РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ — РФ Бырабыыталыстыбатын бэрэссэдээтэлин солбуйааччы Юрий Трутнев киллэрбитэ. Бүгүн кини турнир аһыллыытыгар кытынна.  Икки күн устата күрэхтэһиигэ Саха сириттэн уонна атын эрэгийиэннэртэн 86 киһи кыттыаҕа. Икки күн устата кинилэр квалификационнай, күнүскү, түүҥҥү ытыылар түһүмэхтэрин ааһыахтара.  Юрий Петрович турнир аһыллыытыгар Саха сирэ бэргэн ытааччылардааҕынан куруук биллэрэ диэтэ.  Онон бу күрэхтэһии манна ыытыллара тоҕоостоох, — диэн Ил Дархан Айсен Николаев телеграмҥа суруйда.