Федор Охлопков кэриэһигэр ытыыга турнир сыл аайы ыытыллыа

Сэбиэскэй Сойуус Дьоруойа Ф.М. Охлопков кэриэһигэр аналлаах Уһук Илин ырааҕы ытыыга турнира улахан успуорт событиетынан буолла уонна үрдүк тэрээһиннээхтик ааста.

Арассыыйа Бэрэсидьиэнэ Владимир Путин турнир кыттыылаахтарын уонна тэрийээччилэрин тэрээһин саҕаланыытыгар эҕэрдэлииригэр анал байыаннай дьайыы кыттыылаахтарын, силовой стурктуралары уонна бэргэнник ытыыга маастардары түмпүт күрэхтэһии Уһук Илин уонна өрөспүүбүлүкэҕэ сүрүн событиенан буолуоҕа диэн бэлиэтээн турар.

РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ – РФ Бырабыыталыстыбатын бэрэссэдээтэлин солбуйааччы, турнир кылаабынай судьуйата Юрий Трутнев снайпердар иккис турнирдарын алтынньы ыйга Саха сиригэр ыытарга эппитэ.

Оттон Ил Дархан Айсен Николаев өссө эрдэ Саха сиригэр маннык үөрэтэр-эрчийэр ытар полигон баар буолуута сахаларга уруккуттан баар, снайперскай искусство үгэстэрин сөргүтэргэ кыаҕы биэриэҕэ диэн этэн турар.

Санатан эттэххэ, былырыын РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ – РФ Бырабыыталыстыбатын бэрэссэдээтэлин солбуйааччы Юрий Трутнев сорудаҕынан дойдуга суох бөдөҥ, аныгылыы оборудованиенан сэбилэммит, ирдэбилгэ толору эппэттиир үөрэтэр-эрчийэр полигон тутуллубута.

Бэҕэһээ, турниры тэрийэр кэмитиэт бэрэссэдээтэлэ, Бырабыыталыстыба Бэрэссэдээтэлин солбуйааччы Сергей Местников ырааҕы ытыыга күрэх түмүктэрин таһаарарыгар уопсастыбаннас өттүттэн болҕомто үрдүк буолбутун, атын эрэгийиэннэртэн спортсменнар, байыаннай сулууспалаахтар кыттыбыттарын, сахалар бастыҥ ытыыны көрдөрбүттэрин уонна сыл аайы манна ыытыллар буоларын, бэлэмнэнии саҕаламмытын эттэ.

Турниры түмүктүүр мунньах чэрчитинэн тэрийээччилэргэ, турнир судьуйаларыгар Саха сирин баһылыгын уонна тэрийэр кэмитиэт, биэдэмистибэ наҕараадаларын туттардылар.

Сэбиэскэй Сойуус Дьоруойа Ф.М. Охлопков кэриэһигэр аналлаах ырааҕы ытыыга турнир олунньу 23-25 күннэригэр Дьокуускай куоракка «Сулус» үөрэтэр-эрчийэр кииҥҥэ буолбута. Күрэхтэһиигэ 70-тан тахса киһи – байыаннай сулууспалаахтар уонна спортсменнар кыттыбыттара.