Фейерверк ытарга бу быраабыланы тутус

Биир даҕаны Саҥа дьыл салюта суох буолбат. Сорохтор түүн 12 ч. көрсөн баран оҕолуун-уруулуун тутуспутунан салют ыта тахсаллар. Үөрүүлээх бырааһынньыкка эчэйии ылбат туһугар сүрүн быраабылалары тутуһар ирдэнэр.

Бастакы быраабыла. Салюту атыылаһаргытыгар болдьоҕун хайаан даҕаны көрүҥ, хаачыстыбалааҕы эрэ атыылаһыҥ. Болдьоҕо ааспыт эстимиэн сөп.

Иккис быраабыла. Ытар миэстэҕитин эрдэттэн быһаарыныҥ. Аһаҕас, киэҥ (50х50 м), аттыгар умайар, эстэр туох даҕаны суох, дьиэттэн-уоттан тэйиччи  буолуохтаах.

Пиротехниканы тыаллаах күҥҥэ ытар сэрэхтээх, бобуллар даҕаны диэххэ сөп. Өскөтүн сэртипикээттээх фейерверк ылбыт буоллаххытына, тас өттүгэр хайдах ытар туһунан быраабылата олоччу суруллар, хайаан даҕаны ону тутуһуҥ.

Илийбит салюту ытар кутталлаах, үөһэ тахсымыан, дьонтон чугас эстиэн сөп.

Хайаан даҕаны сиргэ ууран эрэ баран уматыҥ уонна тута тэйэн биэриҥ.  Хаһан даҕаны илиигитигэр тутан туран ытымаҥ.

Үһүс быраабыла. Фейерверк оҕо оонньуура буолбатах. Ханнык баҕарар пиротехниканы улахан, ама киһи эрэ ытыахтаах.

Төрдүс быраабыла. Эстибэтэҕинэ тута сүүрэн тиийимэҥ, хайаан даҕаны уонча мүнүүтэ кэтэһиҥ. Хаачыстыбата суох салют тохтуу түһэн баран эстиэн сөп.

Бэһис быраабыла. Салют ытар кэмҥитигэр дьиэ кыылларын ыраах илдьиҥ эбэтэр дьиэҕэ хаалларыҥ. Улахан тыастан, сырдык, чаҕылхай уоттан куттанан куотан хаалыахтарын сөп.

Алтыс быраабыла. Салюту ытан баран хаалбытын, түгэҕин бэйэҕит кэннигититтэн булгуччу хомуйуҥ, эстибэтэхтэри икки суукка устата уулаах иһиккэ угуҥ, ол эрэ кэннэ быраҕыҥ. Уокка быраҕар кыккыраччы бобуллар.