Феодосия Иванова: «Хас биирдии эмтэнээччигэ көмөбүт көдьүүстээх буоларыгар кыһаллабыт»

Бүгүн Араагы утары охсуһуу бүтүн аан дойдутааҕы күнэ. Бу күнү көрсө Саха сиригэр  олунньу 2-6 күннэригэр онкология ыарыыларын сэрэтии нэдиэлэтэ ыытыллар.

Онкология ыарыыларын эрдэттэн сэрэтии  Саха сирин доруобуйатын харыстабылын сүрүн хайысхаларыттан биирдэстэринэн буолар.

Доруобуйа туругун бэрэбиэркэлэтии уонна диспансеризация онкология ыарыыларын эрдэттэн буларга көмөлөһөр, ол түмүгэр эмтэнии үчүгэй түмүктээх буолар.

Исписэлиистэр бэлиэтииллэринэн, ыарыы ыалласпатыгар киһи  бэйэтин доруобуйатыгар сыһыана олус улахан оруолу ылар. Ол да иһин, быраастар табахтан, арыгыттан аккаастанарга, сөптөөхтүк аһыырга, бэйэ ыйааһынын хонтуруоллана, куруук хамсана-имсэнэ  сылдьарга сүбэлииллэр.

50 саастарын аһарбыт дьон иммунохимическай анаалыһы туттарыахтаахтар  эбэтэр колоноскопия өҥөтүнэн туһаныахтаахтар.  30-тан үөһээ саастаахтар гинеколог-бырааска сыл аайы көрдөрүнүөхтээхтэр.  Саха сиринээҕи онкология киинин исписэлиистэрэ бэйэлэрэ  толкуйдаан олоххо көдьүүстээхтик киллэрэ сылдьар онкопоисксаха.рф платформаҕа (атын эрэгийиэннэргэ суох) онлайн-скриниҥҥэ кыттыахха сөп. Манна тыҥа, быар, эмиий, суон уонна көнө оһоҕос, самах былчархайа, дьахтар киэлитин шейката уонна айах искэнэ үөскүүр кутталын быһаарыахха сөп.

Маны сэргэ, ыарыыны сэрэтэр туһунан Онкология өрөспүүбүлүкэтээҕи киинин  мобильнай бөлөхтөрө  (онкогинеколог, онкохирург, маммолог, ультразвуковой диагностика бырааһа уонна  эндоскопист) улуустарга тиийэн,  нэһилиэнньэ доруобуйатын көрөллөр-истэллэр. Ол эбэтэр РФ бэрэсидьиэнэ Владимир Путин көҕүлээбит “Уһун уонна көхтөөх олох” национальнай бырайыак чэрчитинэн “Онкодесант” бырайыак сүрүн соругунан  төһө кыалларынан элбэх нэһилиэнньэни хаачыстыбалаах диагностиканан хааччыйыы уонна тустаах сүбэни-аманы биэрии буолар. Мобильнай биригээдэ быраастара нэһилиэнньэни кытары үлэлэрин сэргэ, Оройуоннааҕы киин балыыһалар  үлэһиттэрин үөрэтэллэр. Мобильнай биригээдэлэр быйыл Алдан, Амма, Үөһээ Бүлүү, Бүлүү, Ленскэй, Өлүөхүмэ, Нам, Нерюнгри, Ньурба, Томпо, Чурапчы, Уус Маайа улуустарыгар тиийэн үлэлииллэрэ торумнанар.

Саха сиригэр онкологияҕа амбулаторнай көмөнү оҥорорго 17 киин үлэлиир. Онкология амбулаторнай көмөтүн кииннэригэр 2025 сыл тоҕус ыйыгар 47 тыһыынча кэриҥэ киһи сырытта. Амбулатория кииннэрин үлэлэрин көмөтүнэн, 436 кутталлаах искэни булбуттарыттан, үгүс өттө ыарыы саҕаланыытыгар билиннэ.

Cаха сирин онкологтара инники иһэр аныгы ньымалары туһаналлар, эминэн хааччыллаллар. Онкология диспансерын быйылгы бүддьүөтүгэр эми-тому атыылаһарга 2 миллиард 600 мөлүйүөн солкуобай  эмтээх препараттары атыылаһарга көрүлүннэ.

Федосия Иванова, СӨ Доруобуйа харыстабылын министиэристибэтин штаты таһынан кылаабынай онколога:

-Биһиги ыарыһахтарбытын эминэн-томунан эмтиирбитигэр  инновационнай ньымалары (таргетнай терапияттан саҕалаан иммуноонкологическай препараттарга тиийэ) хото туһанабыт. Ол үчүгэй түмүктэри ситиһэргэ уонна эмтэнээччилэрбит олохторун хаачыстыбатын тупсарарга көмөлөһөр. Ааспыт сылга диспансербытыгар искэни утары охсуһар терапия 12 195 кууруһа ыытылынна. Биһиги терапиянан эмтээһин саҥа ньымаларын салгыы үөрэтэбит, хас биирдии эмтэнээччи саамай аныгы уонна туһалаах көмөнү ыларыгар туох кыалларын барытын оҥоробут.