Филармония саҥа сиргэ көһөргө бэлэмнэнэр

Г.М.Кривошапко аатынан филармония эпос уонна ускуустуба Арктикатааҕы киинигэр кэнсиэртиир саала арыллыытыгар төһө бэлэмнээхтэрин СӨ Ил Дархана Айсен Николаев тэрилтэ генеральнай дириэктэрин Туйаара Пестрякованы кытта кэпсэттэ.

Онуоха Туйаара Пестрякова көрөөччүлэргэ кэнсиэртииргэ симфоническай оркестр бырагырааматын таһынан, духовой оркестр бырагыраамата, камернай ансаамбыл, хор бары бэлэм буолуохтарын туһунан иһитиннэрдэ. Филармония састаабыгар хас да айар кэлэктиип үлэлиир. Олортон саамай улаханнара — «Symphonica Artica» симфоническай оркестр.

Ил Дархан кэпсэтиигэ саҥа кэнсиэртиир саалаҕа биллэр-көстөр улахан музыканнары ыҥыран кытыннарарга эттэ.

Быйыл филармония репертуара Аҕа дойду уоттаах сэриитигэр Улуу Кыайыы 80 сылыгар ананар.

Санатан эттэххэ, Ил Дархан Айсен Николаев эпос уонна ускуустуба Арктикатааҕы киинин Судаарыстыбаннас күнүгэр — балаҕан ыйын 27 күнүгэр, арыйарга сорудахтаабыта.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, СИА