«Финансики» бырайыагы Эльвира Набиуллинаҕа билиһиннэрдилэр

Үп-харчы өттүнэн билиилээх буолууну сайыннарар ассоциация гранынан өйөбүлүн чэрчитинэн, 144 бырайыагы олоххо киллэрэргэ үбү көрдө. Итинтэн Арассыыйа Баанын бэрэссэдээтэлигэр билиһиннэриигэ 7 бырайыак талылынна, ол иһигэр Н.Д. Неустроев аатынан «Смарт» бибилэтиэкэ олоххо киллэрбит «Финансики» бырайыага.

Москваҕа финансовай үөрэхтээһин волонтердарын XI съеһэ буолан ааста. «Финансики» бырайыак ааптара уонна салайааччыта, SMART бибилэтиэкэ култуурунай-сырдатар үлэҕэ салаатын салайааччы Розалия Ксенофонтова анимационнай ойуулуктар сиэрийэлэрин, комикстары уонна үп-харчы туһунан үөрэтэр уруоктар хайдах айыллыбыттарын туһунан кэпсээтэ. Салгыы былааннарын үллэһиннэ, ону тэҥэ, «Финансики» комикс экземплярдарын Арассыыйа Баанын бибилэтиэкэтигэр туттарда.

Сийиэс сыл аайы ыытыллар уонна бэрэссэдээтэли кытта көрсүһүүгэ дойду араас муннугуттан үп-харчы үөрэҕин волонтердарын бастыҥ бырайыактара талыллаллар.

Эльвира Набиуллина уонна бэрэссэдээтэли солбуйааччы Михаил Мамута эҕэрдэ тылларын кэнниттэн, үп-харчы үөрэҕин сайыннарар ассоциация бэрэссэдээтэлэ Вениамин Каганов тыл эттэ. Кини ассоциация быйыл грант уонна ресурснай өйөбүл чэрчитинэн 144 бырайыагы олоххо киллэрэргэ үбү көрбүтүн бэлиэтээтэ. Итинтэн Арассыыйа Баанын бэрэссэдээтэлигэр билиһиннэриигэ 7 бырайыак талылынна, ол иһигэр «Финансики» киирдэ.

Рязань, Ростов, Сахалин уобаластарын уонна Красноярскай кыраай волонтердара эмиэ бэйэлэрин бырайыактарын туһунан кэпсээтилэр.