Физкултуураҕа Бүтүн Арассыыйатааҕы олимпиада кыайыылаахтара тугу кэпсииллэр?

Бэҕэһээ нэдиэлэ кэриҥэ барбыт физкултуураҕа Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэ бүттэ. Кыайыылаах, миэстэлэспит оҕолор туох санаалаахтар?

Софрон Скрябин, Дьокуускай куораттааҕы национальнай гимназия 10-с кылааһын үөрэнээччитэ:

— Бу олимпиадаҕа былырыыҥҥыттан бэлэмнэнним. Үөрэтэр-эрчийэр түмсүүлэр Дьокуускайга буолбуттара. Ордук үчүгэйдик гимнастикаҕа кытынным, теориябын ыарырҕаттым. Былырыын эмиэ тустаах олимпиадаҕа киириэхтээх этим эрээри, эчэйии ылан кыттыбакка хаалбытым.

Челябинскай уобалас оҕолоро күүскэ бэлэмнэнэллэр эбит. Холобур, былырыыҥҥы олимпиада кэнниттэн биир эрэ нэдиэлэ сынньанаат, тута дьарыктанан барбыттар, эрчийэр-сүүмэрдиир түмсүү номнуо саҕаламмыт. Челябинскай, Ульяновскай уобалас оҕолорун кытта билистим.

Ирина Федорова, Дьокуускай куорат 17-с нүөмэрдээх оскуолатын үөрэнээччитэ: Уһун, кэтэһиилээх кыайыым дьэ кэллэ. Бу сорукпун толоруум уһун кэминэн ситиһилиннэ, сырам түмүгэ көһүннэ. Олус үөрдүм, дьоллоннум.

Кыайыы кэлэрин туһугар, дьиссиппилиинэ, бэйэни хааччахтыыр, уустуктары тулуйар, кутталы, саарбахтааһыны кыайар, тус бэйэ күүһүгэр эрэллээх буолар ирдэнэр.

Полина Гоманова, Дьокуускай куорат 31-с нүөмэрдээх оскуолатын 9-с кылааһын үөрэнээччитэ:

— Бу олимпиада миэхэ улахан уопуту биэрдэ. Бастакы кыттыыбар миэстэлэспиппиттэн олус үөрдүм, миэхэ улахан киэн туттуу буолар. Түөрт сааспыттан “Ийэм, аҕам уонна мин” курдук успуорт күрэхтэһиилэригэр кыттарым. Ийэм волейболунан, аҕам боксанан дьарыктанар, онон бэйэбин өйдүөхпүттэн успуорт миэхэ чугас. Успуорт – мин олоҕум. Инники идэбин успуорду кытта ситимнээбэтэхпинэ даҕаны, син биир дьарыктаныам. Олимпиадаҕа ордук гимнастиканы ыарырҕаттым. Миигин кытта үлэлэспит тириэньэрдэрбэр, учууталларбар барыларыгар махтанабын.

Елизавета Пархоменко, Полина Лопатина, Хабаровскай кыраай 9-с, 10-с кылааһын үөрэнээччилэрэ:

— Мин бу олимпиадаҕа үһүс төгүлбүн кытынным, Полина — бастакытын. Хас сырыы ахсын долгутуулаах, кыайыылаах тахсар олус үөрүүлээх. 7-с кылааска үөрэнэр сылбар миэстэлэспитим, былырыын бастаабытым.

Тус бэйэбэр саамай уустук теория буолла. Элбэҕи ааҕар, билэр-көрөр ирдэнэр. Уопсайынан, ханнык баҕарар көрүҥ син биир туох эрэ уустуктаах. Салгыы даҕаны успуордунан дьарыктанар, олимпиадаҕа кыттар былааннаахпыт. Билиҥҥитэ ханнык идэҕэ туттарсарбын быһаарына иликпин.

Саха сиригэр аан бастакытын кэллибит. Дьокуускай кыраһыабай куорат эрээри, тымныы эбит.