Физкултуураҕа Бүтүн Арассыыйатааҕы үөрэнээччилэр олимпиадаларын арыйыы үөрүүлээх тэрээһинэ буолла

Бүгүҥҥүттэн Дьокуускай Арассыыйа 81 эрэгийиэниттэн 292 бастыҥтан бастыҥ, быһыйтан быһый эдэр спортсменнара кытыылаах успуорт туонатыгар кубулуйар. Бу сырыыга физкултуураҕа Бүтүн Арассыыйатааҕы үөрэнээччилэр 25-с олимпиадаларын түмүктүүр түһүмэҕэ ыытыллар.

Цииркэ дьиэтин иннигэр сэлии кыыл күн уотун сылааһыгар оҕотунаан сыламныыр. Кыратыттан оҕонньоругар тиийэ дьон тоҕуоруһа мустан хаартыскаҕа түһэр. Цииркэ дьиэтигэр киирээти кытта хаҥас диэки тыыннаах муусука доҕуһуоллуу көрсөр. Иккис мэндиэмэҥҥэ тахсааты кытта, аны, оҕолор оонньуур муусукалара ньиргийэн олорор. Онтон саала иһэ кустук сэттэ өҥүнэн оонньуур араас анал пуормалаах хамаандаларынан толору.

Иккис мэндиэмэҥҥэ олимпиаданы тэрийээччилэр анал баннерга чугаһааттарын кытта камералаах, диктофоннаах, төлөпүөннээх суруналыыстар үгэс быһыытынан төгүрүйэн кэбиһэллэр.

Физкултуура биридимиэтигэр Бүтүн Арассыыйатааҕы үөрэнээччилэр олимпиадаларын дьүүллүүр сүбэтин бэрэссэдээтэлэ, Москватааҕы физическэй култуура судаарыстыбаннай академиятын ректора: “Оҕолор киэҥ-нэлэмэн Арассыыйа 81 эрэгийиэниттэн кытта кэллилэр. Олимпиада икки улахан чаастан турар: теория-мэтиэдикэ уонна быраактыка сорудахтара. Быраактыка сорудаҕа өссө түөрт тургутууттан турар. Манна акробатическай гимнастика, оонньуу көрүҥнэрэ, тулуур, персональнай-прикладной физическэй култуура (манна национальнай элэмиэннэр киирэллэр, ол иһигэр сахалыы). Оҕолор бастыҥ көрдөрүүнү ситиһэллэригэр баҕарабыт”, – диэн оҕолорго алгыс тылын бириэртэ.

РФ Үөрэҕириитин министиэристибэтин судаарыстыбаннай уопсай үөрэхтээһиҥҥэ бэлиитикэтин уонна оскуола иннинээҕи үөрэҕи сайыннарыыга департаменын нуорма-быраап өттүнэн хаачыйыыга салаатын начаалынньыгын солбуйааччы Зарема Эргашева: “Бастатан туран, Саха сирэ олимпиаданы сэҥээрбитин бэлиэтиибин. Саха сиригэр ыытыллыбатаҕа ыраатта. Кэлин олимпиада түмүктүүр түһүмэҕин ыытыан баҕарар субъект үксээтэ. Физкултуураҕа Бүтүн Арассыыйатааҕы үөрэнээччилэр олимпиадалара саамай элбэх кыттааччылаах. Кыайыылаахтар, миэстэлэспиттэр үөрэххэ чэпчэтиилээх киириэхтэрин уонна дойду сүүмэрдэммит хамаандатыгар киирэн аан дойдуга кыттыахтарын сөп. Бу олимпиада таһымынан саамай уустук. Сорудахтара бэрт уратылар уонна хаһан даҕаны хатыламматтар”, – диэн эттэ.

Үөрэх уонна билим миниистирэ Нюргуна Соколова: “Саха сирин хамаандатыгар аҕыс оҕо киирэр. Бу Дьокуускай уонна Нерюнгри куорат оскуолаларын үөрэнээччилэрэ – биэс кыыс, үс уол. Өрөспүүбүлүкэ хамаандата үс үөрэтэр-эрчийэр түмсүүнү ааспыта.

Успуорт эбийиэктэрэ норуоттар икки ардыларынааҕы ирдэбилгэ эппиэттииллэр. Барыта биэс эбийиэги бэлэмнээтибит. Дьүүллүүр сүбэ олимпиада көрүҥнэрин быһаарыаҕа. Оччоҕо ханнык күҥҥэ, ханнык эбийиэккэ тэрээһин ыытылларын билиэхпит”,  — диэн эттэ.

Билим Дьоҕус академиятын ректора Василий Павлов: “Оҕолор олимпиада иитинэн ыытыллар култуура тэрээһиннэригэр муус устар 16-17 күннэригэр сылдьыахтара. Саха сирин киэҥник биллэр түмэллэрин көрүөхтэрэ, патриотическай ис хоһоонноох лиэксийэлэр буолуохтара. Биһиги эрэгийиэммит туһунан элбэҕи билиэхтэрэ-көрүөхтэрэ. Оҕолору арыаллааччыларга туспа дьыалабыай бырагыраама оҥоһуллубута. Ол курдук, биллэр-көстөр миэстэлэринэн сылдьыахтара, төрүт көрүҥнэрдээх маастар кылаастардаах идэ таһымын үрдэтэр, уо.д.а. тэрээһиннэр ыытыллыахтара”, – диэн иһитиннэрдэ.

Аренаҕа муусука ньиргийээтин кытта кэлин уостан түспэккэ ылланар буолбут “Матушка земля” ырыанан цииркэ акробаттара, “Сюрприз” эстраднай үҥкүү народнай ансаамбыла тахсаллар. Салгыы Дьокуускайдааҕы кадеттар интэринээт-оскуолаларын үөрэнээччилэрэ олимпиада кыттааччыларын – Арассыыйа 81 эрэгийиэнин былааҕын туппутунан тахсан параадтыыллар.

Бырабыыталыстыба бэрэссэдээтэлин солбуйааччы Анатолий Семенов: “Саха Өрөспүүбүлүкэтэ Арассыыйа элбэх субъектарын курдук бэйэтэ спортивнай үгэстэрдээх, Роман Дмитриев, Павел Пинигин курдук Олимпиада, аан дойду, Европа, Арассыыйа чөмпүйүөннэрэ тахсыбыттара. Физкултуура олимпиадатын түмүктүүр түһүмэҕэ Дьокуускай куоракка ыытылларыгар быһаарыы ылыныллыбытыттан үөрэбит. Бу нэдиэлэ чаҕылхай, умнуллубат түгэннэри бэлэхтииригэр эрэнэбин. Ситиһиилэри баҕарабын! Поехали!” – диэн этээтин кытта, арена ытыс тыаһынан хабылла түһэр.

Тэрээһин иитинэн олимпиада эрэгийиэннээҕи түһүмэҕин дьүүллүүр сүбэтин чилиэнэ, СӨ физкултуураҕа учууталларын холбоһугун уопсастыбаннай түмсүүтүн бэрэссэдээтэлэ Михаил Иванович Варламовка, Ф.И.Авдеева аатынан оҕо айымньытын дыбарыаһын түмэлин салайааччыта Анисия Ивановна Ивановаҕа үөрэх эйгэтигэр үтүөлэрин, үгүс сыллаах үтүө суобастаах үлэлэрин иһин “РФ үөрэҕин бочуоттаах үлэһитэ” буочаттаах ааты иҥэрдилэр.

Олимпиада кыттааччыта, Дьокуускай куораттааҕы национальнай гимназия 10-с кылааһын үөрэнээччитэ Софрон Скрябин: “Хамаандаҕа күүстээх сүүмэрдээһини ааһан киирдим. Быйылгы олимпиадаҕа миэстэлэһэр соруктаах кыттабын”, – диэн кылгастык санаатын үллэстэр.

Тэрийээччилэр иһитиннэрэллэринэн, саамай элбэх кыттааччылаах Москва, Москва уобалаһын уонна Татарстан хамаандалара буолаллар. Олимпиадаҕа дойду 81 эрэгийиэниттэн 7-11 кылаас 292 үөрэнээччитэ кыттар. Ситиһиилэри!