Гаас уматыкка көһөрүү субсидия кээмэйэ үрдүөҕэ

Бу сылтан улахан уйуктаах тырааныспары гаас уматыкка көһөрүүгэ субсидия муҥутуур кээмэйэ 1 мөл.солк. диэри үрдүөҕэ. Маннык уларытыылары «Эниэргиэтикэни сайыннарыы» судаарыстыбаннай бырагыраамаҕа киллэриэхтэрэ. Бу саҥа миэрэ туһунан иһитиннэрии дойду бырабыыталыстыбатын саайтыгар таҕыста.

Субсидия харчыта тырааныспар уматыгын метаҥҥа көһөрүүгэ туһуланар уонна айылҕа гааһыгар наадыйыыны үрдэтиигэ ананар. Билигин улахан уйуктаах тырааныспары гаас уматыкка көһөрүүгэ субсидия кээмэйэ 500 тыһ.солк. тэҥнэһэр. Субсидиянан урбаанньыттар уонна юридическай сирэйдэр туһаныахтарын сөп.

Санаттахха, Саха сиригэр 2025 сылга 500 массыынаны гаас уматыкка көһөрүөхтэрэ. Бу туһунан Бырамыысыланнас уонна геология министиэристибэтигэр иһитиннэрбиттэрэ. 2024 сыл түмүгүнэн Саха сиригэр гаас уматыкка 800-тэн тахса массыына көһөрүллүбүт. Ону таһынан 2028 сылга диэри 4 тыһыынчаттан итэҕэһэ суох тырааныспары гаас оттукка көһөрүллэрэ былааннанар.