Гагарин уокуругар саҥа SMART-поликлиника аһыллара чугаһаата

РФ бэрэсидьиэнэ Владимир Путин көҕүлүүр “Уһун уонна көхтөөх олох” национальнай бырайыагын чэрчитинэн, өрөспүүбүлүкэҕэ доруобуйа харыстабылын саҥа бырайыактарын тутан үлэҕэ киллэрии тэтимнээхтик салҕанар.

Бу сотору, балаҕан ыйын бүтүүтэ — алтынньы саҥатыгар киин куорат хотугу өттүгэр, Гагарин уокуругар  SMART-поликлиника аанын арыйара торумнанар. Билигин саҥа эбийиэк 92 бырыһыан бэлэм.

Поликлиника “ВИС” бөлөх уонна өрөспүүбүлүкэ бырабыыталыстыбатын икки ардыларыгар судаарыстыбаннай-чааһынай бииргэ үлэлээһин туһунан сөбүлэһиигэ олоҕуран тутуллар.

Тутуу түмүктүүр түһүмэҕин бүгүн, атырдьах ыйын 26 күнүгэр, суруналыыстарга билиһиннэрдилэр.

“Көрөргүт курдук, билигин  ис үлэлэр ыытылла тураллар. Балаҕан ыйыгар көҕөрдүү үлэтигэр турунуохпут уонна саҥа эбийиэк таһын тупсарыахпыт. Дойдуга төһө да ыарахан балаһыанньа турдар, өрөспүүбүлүкэ Доруобуйатын харыстабылын министиэристибэтин кэнсиэпсийэтинэн тэриллэрбит барыта, чуолаан Philips хампаанньаттан атыылаһылыннылар. Онон мэдиссиинэ саҥа тэриллэрин таҥа, бэлэмнии сылдьабыт”, — диэн «ВИС Развитие» генеральнай дириэктэрэ  Андрей Суслов кэпсээтэ.

Улахан дьоҥҥо  уонна оҕолорго аналлаах поликлиникалаах, дьахтар консультациятын отделениелаах, алта мэндиэмэннээх саҥа эбийиэк симиэнэҕэ 600-чэ эмтэнээччини көрүөҕэ. Ону таһынан “Суһал көмө” ыстаансыйатын салаата баар буолуоҕа. Суһал көмөҕө икки биригээдэ үлэлиирэ суһал көмө табыгастаах уонна ааттыын да суһал буолара күүтүллэр. Ону таһынан Онкология өрөспүүбүлүкэтээҕи киинин салаата, онкология амбулатория киинэ эмиэ поликлиникаҕа сыһыарыллыбыт ыарыһахтары көрүөҕэ-истиэҕэ.

Куорат бу уокуруга саҥа поликлиникаҕа наадыйбыта быданнаата. Манна олорор нэһилиэнньэтэ да элбэх. Онон саҥа поликлиника эһиилгиттэн ыла Гагарин уокуругун сэргэ, Жатай, Кангаласс, Тулагы оройуоннарын  дьонун мэдиссиинэ көмөтүнэн хааччыйар соруктаах.

Ол туһунан Дьокуускай куорат 2-с нүөмэрдээх балыыһатын кылаабынай бырааһа Саргылаана Васильева:

«Биһиги билигин 43 тыһыынча кэриҥэ нэһилиэнньэни мэдиссиинэ өҥөтүнэн хааччыйабыт. Поликлиника үлэҕэ киирдэҕинэ,  куорат хотугу өттүгэр сытар  сэлиэнньэлэр олохтоохторун учуоттаан, 55 тыһыынчаҕа тиийэ киһини көрөр-истэр буолуохпут”, — диэн кэпсээтэ.

SMART-поликлиника национальнай бырайыагынан уонна Ил Дархан Айсен Николаев өйөөһүнүнэн аныгы магнитнай-резонанснай көмпүүтэр  томографтарынан, сыыппаралаах ультразвуковай систиэмэлэринэн, эспиэр-кылаастаах рентгент, эндоскопия, маммография, флюорография тэриллэринэн сэбилэниэҕэ.

Саҥа эбийиэги суруналыыстарга билиһиннэрэ сылдьан, бэлэм кэбиниэттэри, мэдиссиинэ саҥа тэриллэрин кэрийэ сылдьан көрдөрдүлэр.

Ханнык баҕарар саҥа Киин аһыллар түгэнигэр туһааннаах каадырдары эрдэттэн бэлэмниир үгэс Саха сиригэр олохсуйда. Холобур, Онкология киинэ аһылларыгар анал үөрэхтээх исписэлиистэр хайыы үйэ бэлэм буоланнар, каадырынан хааччыллыы кыһалҕата турбатаҕа. Ол курдук, SMART-поликлиникаҕа каадыр тиийбэтин боппуруоһа үөскээбэтэ сабаҕаланар. Тоҕо диэтэххэ, СӨ доруобуйа харыстабылын миниистирин солбуйааччы Дмитрий Сергин иһитиннэрбитинэн,  чопчу бу поликлиникаҕа кэлэн үлэлиэхтээх исписэлиистэри бэлэмнииргэ ХИФУ мэдиссиинэҕэ институтун кытары үлэ ыытыллыбыт.

Поликлиникаҕа өссө биир саҥа өрүтүнэн эмтэнээччи доруобуйатын чинчийиилэр туһунан чахчылар уонна лаборатория анаалыстарын түмүктэрэ электроннай ньыманан бэриллиэхтэрэ.