ГАИ Хатаска буолбут суол быһылаанын туһунан сиһилии иһитиннэрдэ

Хатас сэлиэнньэтигэр матасыыкыл уонна массыына утарыта харсыһыыларыттан 15 уонна 16 саастаах икки саастарын ситэ илик оҕо олохтон туораата.

Саха сиринээҕи ГАИ барыллаан дааннайынан, сокуоннай сааһын ситэ илик уол ыытар матасыыкыла утары суол балаһатыгар тахсыбыт, оттон массыына суоппара мэдиссиинэ көрүүтүтэн аккаастаммыт.

Суол быһылаана атырдьах ыйын 9 күнүгэр түүн үс чаас саҕана тахсыбыт. 15 саастаах матасыыкыл суоппара уонна кини 16 саастаах пассажира 50 лет Победы уулусса диэкиттэн Воинскай уулусса диэки айаннаан испиттэр.

Биир кэмҥэ уол оҕо уруулун сыыһа туттар, утары иһэр «Toyota Allion» массыынаҕа кэтиллибит. Ол күн ардах түспүт, аспаал инчэҕэй эбит. Ылбыт эчэйиилэриттэн иккиэн уолаттар суһал көмө кэлиэн иннинэ быһылаан буолбут сиригэр тыыннара быстыбыт.

Суол быһылаана буолар кэмигэр пассажир эрэ мотошлемнаах эбит. Ону таһынан, «Regulmoto» маркалаах матасыыкыл  учуокка туруоруллубатаҕа уонна страховката суоҕа быһаарыллыбыт.

Массыына уруулугар 36 саастаах суоппар олорбут. Суол быһылааныгар кини эмсэҕэлээбэтэх. Ыытар ыстааһа — 12 сыл. Сыл устата суол быраабылатын кэһии иһин 8-та административнай эппиэтинэскэ тардыллыбыт, онтон түөрдэ – түргэн сырыытын иһин. Мэдиссиинэ көрүүтүн ааһартан аккаастаммыт. Суол быһылаанын бары төрүөтүн уонна туругун силиэстийэ быһаарыа.