ГАИ сулууспата тохсунньу 9 күнүгэр диэри күүһүрдүллүбүт эрэсииминэн үлэлиэҕэ

Суол быһылаанын аҕыйатар сыалтан, Саха сирин үрдүнэн ГАИ үлэһиттэрэ тохсунньу 9 күнүгэр диэри үлэ күүһүрдүллүбүт эрэсиимигэр көстүлэр. Өрөспүүбүлүкэтээҕи уонна федеральнай суоллары патруллааһын, ол иһигэр «КАМАЗ» массыынанан көһө сылдьар постары туһаныахтара.

Ахсынньы 11 күнүнээҕи туругунан, өрөспүүбүлүкэ суолларыгар 669 суол-тырааныспар быһылаана бэлиэтэммит, онно 77 киһи олоҕо быстыбыт, 859 киһи эчэйбит. 104 быһылаан итирик суоппардар буруйдарынан тахсыбыт, түмүгэр 22 киһи өлбүт уонна 135 киһи бааһырбыт. Ону таһынан, 16-гар диэри саастаах оҕолор кыттыылаах 105 быһылааҥҥа үс оҕо өлбүт, 116 оҕо эчэйбит. Бу тэрээһиннэр кэмнэригэр иниспиэктэрдэр суол быраабылатын ыараханнык кэһиилэри булан таһаарыыга болҕомтолорун ууруохтара. Ураты болҕомтоҕо — бырааба суох уонна итирик туруктаах массыынаны ыытыы, утары балаһаҕа суолга тахсыы, ону тэҥэ пассажирдары, ордук сокуоннай саастарын ситэ илик оҕолору, таһар быраабыланы тутуспат буолуу киириэҕэ.

ГАИ сулууспата өрөспүүбүлүкэ олохтоохторугар уонна ыалдьыттарыгар туһаайан, уруулга сөптөөҕө суохтук туттар суоппардары көрдөххүтүнэ, туора туран хаалбакка, дьуһуурунай чааска кэмигэр биллэрэргитигэр көрдөһөр. Төлөпүөн нүөмэрдэрэ: 127, 8 (4112) 47-35-69, 8 (4112) 35-22-22, оттон улуустарга полиция отделларын нүөмэрдэринэн.

«Суол быраабылатын тутуһуҥ уонна суолга сэрэхтээх буолуҥ! Туман, буурҕа, улахан массыыналартан тахсар буруо айаҥҥа мэһэйдиэхтэрин сөп. Ыраах айаҥҥа турунуох иннинэ массыынаҕыт  туругун сылаас сиргэ бэрэбиэркэлээҥ, сылаас таҥастаах сылдьыҥ, чугас дьоҥҥутун кытта сибээскитин быһымаҥ! Бэйэҕитин уонна тулалыыр дьону харыстааҥ!» — диэн ГАИ управлениетыгар суруйаллар.