ГАИ иниспиэктэрдэрэ алдьаммыт тимир көлөнү оҥорорго көмөлөстүлэр

Саҥа дьыл буолан, ыраах-чугас улуустарга кэлии-барыы элбэх. Саҥа дьыл иннинэ барбыттар билигин төттөрү айанныыллар. 

Бу күннэргэ Мэҥэ Хаҥаластааҕы ДПС отделын иниспиэктэрдэрэ, полиция лейтенаннара Дмитрий Алексеев  уонна Роберт Егоров киэһэ дьуһуурустубалыы сылдьан, Аллараа Бэстээххэ маҕаһыын аттыгар «УАЗ» тимир көлө сигналкатын холбонон турарын бэлиэтии көрбүттэр. Тиийэн кэпсэппиттэр, дьахтардаах эр киһи Дьокуускайтан Уус Алдан улууһун Бороҕонугар айаннаан иһэллэр эбит. Суоппар тимир көлө уруулун ырычаага алдьаммытын туһунан эппит. Ити кэмҥэ Саҥа дьыллааҕы уһун өрөбүллэр буоланнар тустаах маҕаһыыннар бары сабыылаах эбиттэр. Ол эрээри, ГАИ үлэһиттэрэ билэр дьонноруттан ыйыталаһан тустаах саппаас чааһы булан биэрбиттэр. Онон аара алдьанан турбут дьон салгыы айаннаабыттар. Этэҥҥэ тиийэн баран, эр киһи улуустааҕы ГАИ диспетчэригэр эрийэн махталын биллэрбит.

СӨ Госавтоинспекцията.