Галина Федорова: «Уон ый устата биир да күн өрөөбөккө»

Былырыын күһүн быстах ыҥырыы биллэриллэрин кытта “Арассыыйа ийэлэрэ” уопсастыбаннай хамсааһын таһаарбыт ыҥырыытын өйөөн, балаҕан ыйын 30 күнүттэн Ньурба улууһугар “Көмүскэл” диэн саллааттарга байыаннай таҥаһы-сабы тигиигэ уопсастыбаннай төрүккэ иис сыаҕа аһыллан, биир да күн өрөбүлэ суох үлэлии турар.

Бу сыах үлэтин Галина Дмитриевна Федорова иилиир-саҕалыыр, салайар. Улуус баһылыга Алексей Михайлович Иннокентьев Украинаҕа хас да төгүл баран улууспутуттан байыаннай эпэрээссийэҕэ сылдьар буойуттарга бу сыах тигэн бэлэмнээбит набордарын илдьэн биэрэн, ирэ-хоро кэпсэтэн, туох наадатын быһаарсан кэлбитэ.
Бу наборга наһыылка, олбох, ис таҥас, балаклава, кээнчэ, куллука, бэлиэ, ууну курдара аһарбат плащ, флис сэлиэчик, анал сакааһынан автомат уоһугар кыра хах, о.д.а. оҥорон угаллар. Маны тэҥэ хас биирдии саллаакка оҕолор суруктарын кытары харысхал баар буолар. Бу туһунан Галина Дмитриевна «Огни Нюрбы” улууһун хаһыатын telegram-ханаалыгар кэпсээтэ.
— Биһиги сыахпыт бу сылга киирэн баран уоппускаҕа кэлбит оҕолорбутугар тигэн биэрэрбит таһынан тикпит таҥастарбытын байыаннай эпэрээссийэ буола турар сиригэр 4-5-тэ ыыттыбыт. Билигин сайыҥҥы кэмҥэ табыгастаах матырыйаалы көрдөөн булан, кэтэргэ үчүгэй, киһи этэ тыынар көстүүмүн тигэбит. Уон ый устата биир да күн өрөөбөккө, «Көмүскэл» сыах байыаннайдарга таҥас тигэр.

Биһиэхэ куорат дьаһалтата, улуус управлениелара, биирдиилээн дьон көмөлөһөллөр. Ньурба куоратын 1 остолобуойун сэбиэдиссэйэ Оксана Михайловна волонтердарга сороҕор аһылыгынан өйөбүл оҥорор. Киниэхэ, Харламов Валерий Михайловичка, бытыылкалаах ыраас ууну аҕалааччыларга махталбыт улахан.
Байыаннай эпэрээссийэ буолар сиригэр барыахтарын иннинэ саллааттар бастаан биһиэхэ кэлэн кээмэйдэрин хааллараллар. Ардыгар тигэр матырыйаалбыт бүтэн хаалар, оччоҕо рулоннаах таҥаһынан, харчынан көмөлөһөр дьоннор бааллара үчүгэй. Хас биирдии бу курдук көмө, өйөбүл иһин махталбыт муҥура суох. Бу тигэр таҥаспытыгар туох баар дууһабытын, арчылыыр-араҥаччылыыр алгыстаах санаабытын ууран туран тигэбит – биһиги уолаттарбытыгар туох да куттал суоһаабатын, харысхаллаах санаабыт араҥаччылыы сырыттын диэн.
Соторутааҕыта Марха оскуолатын 1968 с. бүтэрбит выпустар харчынан көмө оҥорбуттара. Байыаннай сулууспалаах уоппускаҕа кэлэригэр биһиги сыахпытын тумнубат. Сороҕор тикпит саҥа таҥаспытын таҥнан түспүт видеоларын инники кирбии уоттаах толоонуттан ыытааччылар. Оннук махтал олус күндү.
Байыаннай сулууспа уустук усулуобуйатыгар сылдьыыга табыгастаах кэтэр таҥас-сап, туттар мал-сал уонна уйулҕа өттүнэн бэлэмнээх буолууларыгар күүспүт, өйбүт-санаабыт тиийэринэн көмөлөһө, өйүү, үлэлии олоробут.

Хаартыска «Огни Нюрбы» хаһыат telegram-ханаалыттан ылылынна