Гавриил Чиряев төрөөбүтэ 100 сылыгар документальнай киинэ көрдөрүөхтэрэ

«Путь Гавриила Чиряева» диэн документальнай киинэ судаарыстыбаннай бэлитиичэскэй диэйэтэл төрөөбүтэ 100 сыллаах үбүлүөйүн көрсө көрдөрүөхтэрэ. Киинэ премьерата муус устар 4 күнүгэр «Саха НКИХ» ханаалга 21.00 чаастан уонна «Якутия 24» ханаалга күнүс 14.00 ч.  көрдөрүөхтэрэ.

Киинэни оҥорууга документалист Дарья Ермолаева, режиссердар Лариса Амбросьева, Дмитрий Андерсон уонна оператор Андрей Лазарев үлэлээтилэр.

Киинэ 60 мүнүүтэ устата көстөр. Киинэ архыып докумуоннарыгар олоҕуран уһулунна.

Бырайыак ааптардара бэлиэтииллэринэн, киинэ хартыыната историческай кэми көрдөрөр. Гавриил Чиряев Хотугу эрэгийиэн сайдыытыгар кылаатын, үлэтин-хамнаһын көрдөрөр.

Дьокуускайга бу нэдиэлэҕэ Гавриил Чиряев олоҕун, үлэтин сырдатар «Гавриил Чиряев: сборник документов и материалов» диэн кинигэ сүрэхтэниитэ буолуохтаах.