Гаврил Андросов «Муздак муҥ» кинигэтэ Астанаҕа сүрэхтэннэ

Саха сирин Суруйааччыларын сойууһун бэрэссэдээтэлэ Гаврил Андросов-Хабырыыс Ондороос «Муздак муҥ» («Муустаах муҥ» — «Леденящая грусть») кинигэтэ казахтыы тылынан «Фолиант» кинигэ кыһатыгар бэчээттэнэн таҕыста. 

Казахстан Астана куоратыгар Евразиятааҕы кинигэ быыстапкатын чэрчитинэн, «Муздак муҥ» кинигэ сүрэхтэниитэ буолан ааста. Манна Азия эрэгийиэннэрин кинигэ кыһаларын бэрэстэбиитэллэрэ кытыннылар.

Гаврил Андросов кинигэтэ казахтыы тылынан тахсыыта икки уруулуу норуот култуураларын дьайсыытын көстүүтэ буолар. Саха литературата сайдан иһэрин уонна өрөспүүбүлүкэ тас өттүгэр улахан интэриэһи тардарын туоһулуур.

— «Фолиант» кинигэ кыһатын хаһаайына Нурлан Исабеков Саха сирин Суруйааччыларын сойууһун партнера, доҕоро буолар. Аан бастаан Николай Лугинов кинигэтин, онтон «Саха поэзиятын антологиятын», Наталья Харлампьева кинигэтин таһаарбыта. Мин кинигэбин үсүһүнэн, уһуйбут-такайбыт учууталларым кэнниттэн таһаарбыттарыттан олус үөрэбин.

Салгыы да үлэлэһэргэ бэлэмнэрин биллэрдилэр. «Фолиант» — Орто Азияҕа биир саамай улахан кинигэ кыһата. Арассыыйаҕа, Турцияҕа маҕаһыыннардаах. Олору кытары үлэлэһэр бэрэстэбиитэлистибэлэрдээх, бэйэтэ типографиялаах.

Казахстан култууратын үтүөлээх диэйэтэлэ Даулеткерей Капулы биһигини кытта ыкса үлэлэһэр. Кини биллэр бэйиэт, Казахстан Суруйааччыларын сойууһун Астанатааҕы филиалын салайа сылдьыбыта, билигин «АЛЖИР» (Акмалинский лагерь жен изменников Родины) диэн мусуой-комплекс дириэктэринэн үлэлиир, ону таһынан «Фолиант» кинигэ кыһатыгар уонна Лев Гумилев аатынан Евразийскай университекка эмиэ үлэлэһэр. Кини саха литературатын тарҕатарга, таһаарарга күүскэ үлэлэһэр.

Бу сырыыга кини Саха сирн Суруйааччыларын сойууһун П.А. Ойуунускай аатынан мэтээлинэн наҕараадаланна. Оттон Нурлан Исабеков СӨ култуура, духуобунай сайдыы министиэристибэтин «Төрөөбүт тыллары сайыннарыы иһин» диэн бэлиэнэн наҕараадаланна. Кинилэр саха литературатын улахан доҕотторо буолаллар, — диэн Гаврил Андросов кэпсээтэ.