Георгиевскай лиэнтэни күлүү-элэк оҥостор, киртитэр сатаммат

Георгиевскай лиэнтэни соруйан күлүү-элэк оҥостор, киртитэр дьон биэс сылга диэри болдьоххо көҥүллэрэ быһыллыан сөп. Бу туһунан РИА Новости Госдуума дьокутаата Ольга Занько иһитиннэрдэ.

«Георгиевскай лиэнтэни аһаҕастык соруйан күлүү-элэк оҥостуу, киртитии иһин 3 мөлүйүөн солкуобайга тиийэ ыстараап көрүллэр эбэтэр үс сылга диэри болдьоххо көҥүлү быһыахтарын сөп. Аны туран тэрээһиннээх аахсыйалары ыытар эбэтэр куйаар ситимигэр тарҕатыыны иһин накаастабыл 5 мөлүйүөн солкуобайга тиийэ улаатар эбэтэр биэс сылга диэри көҥүлү быһыахтарын сөп», — диир дьокутаат Ольга Занько.

Онуоха дьокутаат алҕас сиргэ түспүт уонна киртийбит Георгиевскай лиэнтэ иһин накаастабыл көрүллүбэтин бэлиэтээтэ.

Санатахха, 2022 сыллаахха дойду Бэрэсидьиэнэ Владимир Путин Георгиевскай лиэнтэни Албан аат бэлиэтигэр тэҥниир туһунан сокуоҥҥа илии баттаабыта. Ааспыт сыл балаҕан ыйыгар Орловскай уобаласка Георгиевскай лиэнтэ уруһуйун киртиппит уолаттары дьүүллээбиттэрэ.