Георгий Балакшин: «Владимир Путин этиитин кытта толору сөпсөһөбүн»

Владимир Путин быһа эпиир кэмигэр спорт хайысхатыгар санаатын эмиэ үллэһиннэ. 

«Владимир Путин спорт бэлиитикэни кытта бииргэ буолуо суохтааҕын туһунан эппитин кытта толору сөпсөһөбүн. Кини  олимпийскай хамсааһыны төрүттээччи Пьер де Кубэртен: «О, спорт, ты – мир!» диэн этиитин холобурдаата. Бу этиитин аан дойдутааҕы спортивнай уопсастыба ылыныа, истиэ диэн эрэнэбин уонна Арассыыйа спортсменнара аан дойду таһымнаах спортсменнары кытта тэҥ бырааптаныахтара», —  диэн Ил Түмэн ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Георгий Балакшин санаатын үллэһиннэ.

Санатар буоллахха,  Владимир Путин  көҕүлээһининэн, олоххо киирбит «Демография» национальнай бырайыак иитинэн Саха сиригэр 32 спортивнай эбийиэк үлэҕэ киирбит.  Ааспыт биэс сыл устата уонна, 2024 сылга диэри, Саха сиригэр 10-тан аҕыйаҕа суох спорт эбийиэгэ тутуллуохтааҕыттан аҕыһа үлэҕэ киирбит.