Георгий Степанов Бырабыыталыстыба бэрэссэдээтэлин солбуйааччытын дуоһунаһыгар ананна

Георгий Степанов Бырабыыталыстыба бэрэссэдээтэлин солбуйааччытын дуоһунаһыгар ананна.

Олунньу 28 – кулун тутар 1 күнүгэр болдьоммут Ил Түмэн алтыс ыҥырыытын дьокутааттарын уочараттаах 42-c пленарнай мунньаҕын көрүүтүгэр барыллаан 50-ча боппуруос киирбит. Мунньах хаамыытын өрөспүүбүлүкэ олохтоохторо Ил Түмэн youtube ханаалыгар холбонон, быһа эпииринэн көрүөхтэрин сөп.
Пленарнай мунньахха бастакынан Ил Дархан Айсен Николаев өрөспүүбүлүкэ бырабыыталыстыбатын бэрэссэдээтэлин солбуйааччытын дуоһунаһыгар Степанов Георгий Михайлович кандидатуратын олунньу 27 күнүгэр Ил Түмэҥҥэ киллэрбит боппуруоһа көрүллэн, дьүүллэһиллэн ылылынна. Фракциялартан дьокутааттар киниэхэ инники үлэтигэр сыһыаннаах ыйытыылары биэрдилэр, туохха болҕомтону ууруохха сөбүн ыйдылар уонна ситиһиилэри баҕардылар.

Георгий Степанов дьокутааттар иннилэригэр тыл этиитигэр Ил Дархан Айсен Николаевка үрдүк итэҕэлин иһин махтанна уонна: “Билиҥҥи судургута суох кэмнэргэ бу улахан итэҕэйиини тэҥэ сүҥкэн эппиэтинэс буолар. Бырабыыталыстыба тутулугар үлэ уонна социальнай хайысхаҕа саҥа блок киирэн биэрдэ. Онно үлэ, дьарыктаах буолуу, социальнай хааччыйыы, урбаан, саахса өттүгэр үлэлэргэ элбэх хайысхалар киирдилэр”, — диэн бу үлэ Саха сирин нэһилиэнньэтэ социальнай өттүнэн көмүскэллээх уонна инникитин олоҕун таһыма бигэ туруктаах буолуутугар туһаайылларын быһыытынан бары күүһүн, кыаҕын ууран туран үлэлииргэ бэлэмин биллэрдэ.
Степанов Георгий Михайлович — Чурапчы улууһун Чурапчы сэлиэнньэтигэр 1974 сыллаахха муус устар 30 күнүгэр төрөөбүтэ. 1995 сыллаахха РФ Бэрэсидьиэнигэр Судаарыстыбаннай сулууспа Уһук Илиҥҥи акадьыамыйатын бүтэрэригэр «судаарыстыбаннай уонна муниципальнай салайыы» исписээлнэһигэр «менеджер» идэтин ылбыта.
Үлэтин Чурапчыга ЫБСЛКС райкомун тиэхиньиичэскэй үлэһитин дуоһунаһыттан саҕалаабыта. 1995 сыллаахха Судаарыстыбаннай сулууспа Уһук Илиҥҥи акадьыамыйатын бүтэрэн баран, Парламены уонна уопсастыбаннай түмсүүлэри кытта үлэҕэ өрөспүүбүлүкэ Бэрэсидьиэнин уонна бырабыыталыстыбатын кэмитиэтин сүрүн исписэлииһинэн үлэлээбитэ.
1997 сыллаахха Арассыыйа Пенсионнай пуондатын систиэмэтигэр үлэҕэ киирбитэ. 2003 сыллаахха РФ Пенсионнай пуондатын Саха сиринээҕи салаатын управляющайын солбуйааччытынан анаммыта.

2007 сыллаахха РФ Пенсионнай пуондатын ситэриилээх дириэксийэтин тэрийэр үлэҕэ уонна пиэнсийэни төлөөһүҥҥэ Департаменын начаалынньыгын солбуйааччынан анаммыта. 2011 сыл алтынньытыгар РФ Пенсионнай пуондатын Саха сиринээҕи салаатын управляющайынан анаммыта.