Николай Иванов хаартыскаҕа түһэриитэ.
Кулун тутар 27 күнүгэр Доруобуйаларыгар хааччахтаах оҕолору чөлүгэр түһэрэр өрөспүүбүлүкэтээҕи кииҥҥэ СӨ Бырабыыталыстыбатын Бэрэссэдээтэлин солбуйааччы Георгий Степанов сырытта. Кини киин үлэтин-хамнаһын билсэригэр туох-ханнык иннинэ материальнай-тиэхиньиичэскэй хааччыйыыга, каадырынан хааччыллыыга, чөлүгэр түһэрии хайдах ыытылларыгар болҕомтотун туһаайда.
Георгий Михайлович исписэлиистэри кытта көрсүһүүтүгэр Инбэлииттэри кэлимсэ чөлүгэр түһэрии тиһигин Саха Өрөспүүбүлүкэтигэр бигэргэммит кэнсиэпсийэтин туһунан кэпсээтэ, чуолаан, 2030 сылга диэри инбэлиит-оҕолору чөлүгэр түһэрии туһунан.
“Бу сылтан ордук кэмҥэ бэлэмнэммит дьоһун суолталаах докумуон. Бары инбэлииттэри чөлүгэр түһэриигэ уонна абилитацияҕа наадалаах. Былырыын үлэлиирбитигэр олоҕуруохтаах федеральнай стандартар бигэргэммиттэрэ. Онон өрөспүүбүлүкэтээҕи икки чөлүгэр түһэрэр кииҥҥэ өрөспүүбүлүкэтээҕи методическай киин функциятын сүктэрдибит”, — диэтэ кини.
Георгий Михайлович салгыы иһитиннэрбитинэн, Бырабыыталыстыба Бэрэссэдээтэлэ оройуоннарга оҕолору чөлүгэр түһэрэр кииннэр уустук балаһыанньаларын уонна сорох сирдэргэ олох да суохтарын туһунан эппит.
Онон методическай үлэ күүһүрүөхтээх. “Эһиги кииҥҥит – өрөспүүбүлүкэбитигэр чөлүгэр түһэрэр киин мөссүөнэ. Дьиэҕитин-уоккутун толору оҥостубуккутун көрдүм. Оҕолор төрөппүттэрин кытта босхо олороллоругар анаан стационар үлэлээбит. Бу улахан ситиһии. Ону тэҥэ олоххо-дьаһахха үөрэтэллэр, байыаннай дьайыы кыттыылаахтарын дьиэ кэргэттэрин чилиэннэрин доруобуйаларын чөлүгэр түһэриигэ ылан эрэҕит. Бүгүн өрөспүүбүлүкэҕэ 7 тыһыынча инбэлиит-оҕо баар. Кинилэри барыларын хабарга тырааныспарка уустуктар, дьиэҕэ-уокка кыһалҕалар бааллар. Балары учуоттаан, кыахпытын өссө күүһүрдүөхтээхпит”, — диэтэ салгыы Г.М.Степанов.
СӨ Бырабыыталыстыбатын Бэрэссэдээтэлин солбуйааччы бу сырыытын түмүгүнэн икки соругу туруорда. Бастакытынан, элбэх оҕону хабарга. Киин толору кыаҕынан үлэлиэхтээх, инбэлиит-оҕолоох ыалларга көмөлөһүөхтээх. Иккиһинэн, улахан методическай үлэни ыытан, оройуоннарга олорор инбэлиит-оҕолор дьиэ кэргэттэригэр көмөлөһүөхтээх.
Көрсүһүү түмүгэр Георгий Степанов киин кэлэктиибигэр көхтөөх уонна айымньылаах үлэни баҕарда. “Туруоруммут сыалбытын толорууга үлэлиэҕиҥ. Биһиги сорукпут – ресурсанан хааччыйыы, эһиги соруккут – көмөҕө наадыйар ыаллары сүүс бырыһыан хабыы”.
Мария Решетникова.
Бу ый саҥатыгар Норуоттар икки ардыларынааҕы “Саха сирин бриллианнара” хаар уонна муус оҥоһук бэстибээлигэр араас…
Ааһан эрэр 2025 сыл Өймөкөөн улууһун олохтоохторугар айылҕа иэдээнэ -- алдьатыылаах халаан үгүс хоромньуну оҥорон,…
Саҥа дьылга эҕэрдэлэһэн буостанан аккырыыкка ыытыһар үтүө үгэс баара. Ол аныгы үйэҕэ уларыйан турар. Ол…
Саҥа дьыл үүнэр түүнүгэр оҕолуун-уруулуун бары туох эмит дьиктини, уратыны, аптааҕы күүтэбит. Чаһы кураана охсорун…
Бэйэлэрин норуоттарыгар үгүс дьоһуннаах айымньылары хаалларбыт суруйааччылар ааҕааччы өйүттэн-санаатыттан сүппэттэр, кинилэр үлэлэрэ көлүөнэттэн көлүөнэҕэ тириэрдиллэн,…
СӨ Доруобуйа харыстабылыгар министиэристибэтэ мэдиссиинэ тэрилтэлэрин бырааһынньыктааҕы уонна өрөбүл күннэргэ -- ахсынньы 31 күнүттэн тохсунньу…