Георгий Степанов: «Горнай улууһа – байыаннай дьайыы кыттыылаахтарын өйөөһүҥҥэ биир бастыҥ оройуоннарыттан биирдэстэрэ»

Горнай улууһа байыаннай дьайыы кыттыылаахтарын уонна кинилэр дьиэ кэргэттэрин өйөөһүҥҥэ өрөспүүбүлүкэ бастыҥ оройуоннарыттан биирдэстэрэ буолар. Бу туһунан бырабыыталыстыба бэрэссэдээтэлин солбуйааччы Георгий Степанов байыаннай дьайыы кыттыылаахтарын өйүүр өрөспүүбүлүкэ бырабыыталыстыбатын биэдэмистибэлэр икки ардыларынааҕы хамыыһыйатын Горнай оройуонун Бэрдьигэстээх сэлиэнньэтигэр ыытыллыбыт көһө сылдьар мунньаҕар эттэ.

«Горнай оройуонун дьаһалтатын байыаннай дьайыы кыттыылаахтарын уонна кинилэр дьиэ кэргэттэрин өйөөһүҥҥэ үлэтин үчүгэй уопутун бэлиэтиэхпин баҕарабын. Бары ыарахаттары үрдүнэн оройуон байыаннай дьайыы кыттыылаахтарыгар, ол иһигэр байыаннай дьайыылар бэтэрээннэрин олорор дьиэлэрин өрөмүөннээһиҥҥэ уонна тупсаран оҥорууга, эбии социальнай өйөбүл миэрэлэрин олохтоото. Бу бүгүҥҥү күҥҥэ бастакы нүөмэрдээх боппуруос. Бүгүн Бэрдьигэстээх сэлиэнньэтигэр, ол иһигэр, Горнай улууһун дьаһалтатын үлэтин уопутун үөрэтээри, түмүктээри уонна салгыы өрөспүүбүлүкэ атын оройуоннарыгар тарҕатаары кэллибит», – диэн Георгий Степанов бэлиэтээтэ.

Горнай улууһун дьаһалтатын салайааччыта Никита Андреев бэйэтин дакылаатыгар бэлиэтээбитинэн, 2023 сыллаахха оройуон баһылыгын уурааҕынан РФ Сэбилэниилээх күүстэрин састаабыгар сулууспалыыр байыаннай сулууспалаахтар дьиэ кэргэттэригэр олорор усулуобуйаларын тупсарарга 200 тыһыынча солкуобай кээмэйдээх биир кэмнээх материальнай көмөнү оҥорор бэрээдэк бигэргэммит. Бу үп-харчы олорор дьиэни өрөмүөннээһиҥҥэ уонна тупсарыыга туһуланар. 2024 сыллаахха оройуон маннык көмөнү 8 дьиэ кэргэҥҥэ 1 мөл. солкуобайтан тахса уопсай суумаҕа оҥордо. Быйыл бу сыалга хомуурга хаптарбыт уонна өлбүт байыаннай сулууспалаахтар 5 дьиэ кэргэттэригэр 1 мөл. солкуобай көрүлүннэ.

Улууска 8 норумалыыр-быраап аахталартан турар пакет ылыллыбыт, кинилэр байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр социальнай өйөбүл миэрэлэрин комплексын олохтууллар. Кинилэр ахсааннарыгар киирэллэр: биир кэмнээх материальнай көмө, олорор усулуобуйаны тупсарарга сыаллаах көмө, оҕо уһуйааныгар төлөбүртэн босхолооһун, оскуолаҕа оҕолору аһатыы, эбии үөрэхтээһин өҥөлөрө, уопсастыбаннай тырааныспарга айан, сир учаастактарыгар чэпчэтии уонна сир учаастагын биэрии. Маннык өйөбүл миэрэлэрэ оройуон бары нэһилиэктэригэр ылылыннылар.

Муниципальнай бүддьүөттэн байыаннай дьайыы кыттыылаахтарыгар уонна кинилэр дьиэ кэргэттэригэр биир кэмнээх материальнай көмөҕө быйыл оройуон 6,5 мөл. солкуобайы ыытта. 47 дьиэ кэргэн улууска оҕо уһуйааныгар төрөппүт төлөбүрүттэн босхолоннулар. 166 оҕо оскуолаларга босхо итии аһылыгынан хааччылыннылар, сынньалаҥ уонна чэбдигирии тэрилтэлэригэр 89 путевка бэрилиннэ, улуус 15 сайыҥҥы лааҕырыгар байыаннай дьайыы кыттыылаахтарын 76 оҕото сынньанна.